ఈ పుట అచ్చుదిద్దబడ్డది
రేకు: 0361-6 నాగవరాళి సంపుటం: 11-366
పల్లవి: ఎఱఁగ నైతి నిందాఁక యింత నీవు జోలిఁ బెట్టే
దెఱఁగుకో నిన్నుఁ గొల్చే దిందుకొరకా
చ. 1: మాయదారిమాటలే మాపుదాఁకా నాడి నా
కాయముపై నొరగితే కాఁక మానీనా
ఆయములు సళుపఁగ నాసపడి నీరాక
కీయెడ నేఁ గాచుకున్న దొందుకొరకా
చ. 2: నాటకపునవ్వులే నవ్వి నాతో వేగించఁగ
తాఁటలు దూఁటలే కాక తాపము మారీనా
కూటమి గలిగె నంటా కోరన సంతోషముతో
యీటున నుండిన దెల్లా నిందుకొరకా
చ. 3: పెనఁగి వట్టికాఁగిట బిగియించి సారె నా
తనువు నిమిరితేనె తని వయ్యీనా
ఘనుఁడ శ్రీవెంకటేశ గక్కునఁ గూడితి విట్టె
యెన లేని నీ మతకా లిందుకొరకా