ఈ పుట అచ్చుదిద్దబడ్డది
రేకు: 0361-3 శంకరాభరణం సంపుటం: 11-363
పల్లవి: ఇంత నేరకుండితే నీ వేల వచ్చేవు
వింత వింత వగ లెల్ల వింటిఁ గంటిరా
చ. 1: వాలుక రెప్పలు నే వంచిన మాత్రములోనె
నాలికాఁడ నీ తనువు నాఁటె ననేవు
యీలాగు మాట లాడి యిచ్చకాలు సేసుక
కాల మెల్ల బతికితి కానీ కానీరా
చ. 2: చల్లఁగా నే గందవొడి చల్లిన మాత్రములోనె
పల్లదాన తల దిమ్ము పట్టె ననేవు
కల్ల గాదు యింత మాయకాఁడవు గాకుండితేను
యెల్లవారిలోన నేఁడు యెట్టు వేగించేవురా
చ. 3: కొంకక నీ తొడమీఁద గూచున్న మాత్రములోనె
అంకెల నీ కళ దాఁకె నని అనేవు
సంకె లేక నీ వింతేసి జాణవు గాకుండితేను
పొంకపు శ్రీవెంకటేశ పొంచి నన్నుఁ గూడేవా