ఈ పుట అచ్చుదిద్దబడ్డది
రేకు: 0360-6 పాడి సంపుటం: 11-360
పల్లవి: ఎవ్వ రేమి చెప్పిరె యింతలోననే
నివ్వటిల్ల వింత లెల్ల నేరుచుకొంటివా
చ. 1: మోము చూచి నవ్వఁగానె మోనానఁ దల వంచేవు
యేమిటికే కోపము నీ కెన్నఁడు లేమి
కామించి పిలిపించి కడసారె నలిగేవు
నేమమున నివి గొన్ని నేరుచుకొంటివా
చ. 2: దగ్గరి నేఁ గూచుంటె తగ లేచి నిలిచేవు
సిగ్గు గొంత జిగి గొంతఁ జిలికే వేమే
అగ్గలపుఁ బ్రేమ చల్లి అంతలోఁ బిరి తీసేవు
నిగ్గులు నీడలు కొన్ని నేరుచుకొంటివా
చ. 3: కాఁగిట నే నించఁగాను కన్నులు మూసుకొనేవు
మాఁగఁ బెట్టేవు వలపు మతిలో మేలే
పాఁగిన శ్రీవెంకటపతి నన్నుఁ గూడితవి
నీఁగనిరతులు నేఁడు నేరుచుకొంటివా
