ఈ పుట అచ్చుదిద్దబడ్డది
రేకు: 0357-6 బౌళి సంపుటం: 11-342
పల్లవి: కూళతనమౌ బత్తి గొట్టమునఁ బెట్టఁ బోతే
ఆలసించ కిఁక లేవె ఆకెతోఁ జెప్పుదము
చ. 1: వదలి మనసు రానివాని మాట లెన్నైనా
పెదవులపైనె కాని ప్రియము లేదు
యిదివో తారాఁ డట యీడ నుండ మన కేల
ఆదనఁ బోదము రావె ఆకెతోఁ జెప్పుదము
చ. 2: ననుపు లేనివాని నగవు లెందాఁక నైన
పని మాలుటే కాని ఫలము లేదు
మనవు లడగఁ డట మనమే చెప్పఁగ నేల
అనమానించక రావె ఆకెతోఁ జెప్పుదము
చ. 3: ఆరయ రాజసపువాఁ డాస లెన్ని వెట్టినాను
పేరడి నుండుటె కాని పెనఁగ రాదు
యీరీతి శ్రీవెంకటేశుఁ డింత చేసి చెలిఁ గూడె
ఆరితేరె నా సుద్దులె ఆకెతోఁ జెప్పుదమూ
