ఈ పుట అచ్చుదిద్దబడ్డది
రేకు: 0356-2 దేసాళం సంపుటం: 11-332
పల్లవి: కడుఁ బసిబాలుఁడవు కటకటా
యెడతాఁకి బడలితి విటువలెఁ గలదా
చ. 1: యేయడనుండి నా యన్న యిపు డాడి వచ్చితివి
కాయ మెల్లఁ జెమరించెఁ గటకటా
బాయిట నాడుతా నెంత పరువులు వెట్టితివో
యీయెడ బుస కొట్టేవు యిటువలెఁ గలదా
చ. 2: విందుల నెవ్వరియింట వేఁడిపా లారగించితి
కందువ నీ మోవి వొక్కెఁ గటకటా
మందలించి యా డేడ మడుగులు చొచ్చితివో
యందు నీమై గరుపారె నిటువలెఁ గలదా
చ. 3: యెన్నెన్నిచోట్లు నీవు యేమి సేసి అలసితో
కన్నుల నిద్దుర దేరీఁ గటకటా
పన్నిన శ్రీవెంకటాద్రి బాలుఁడ వై నవ్వేవు
యిన్ని నీవే యెరుఁగుదు విటువలెఁ గలదా
