ఈ పుట అచ్చుదిద్దబడ్డది
రేకు: 0355-3 పాడి సంపుటం: 11-327
పల్లవి: సిగ్గుగ లాఁటదానికి చెప్పించుకో నింత యేల
దగ్గరి వుండుటె చాలు తడవకు మమ్మును
చ. 1: వొలిసీ నొల్లని నిన్ను వొడివటి తీయుకంటే
అలిగి నేఁ బవళించు టదియే మేలు
పిలువకుండఁగ నీవు పెనఁగి పై బడుకంటే
తల వంచుకొని వుండే తడవకు మమ్మును
చ. 2: కడు రాజసపు నీతో కలకల నవ్వుకంటే
చిడుముడిఁ జిన్నఁ బొయ్యే చింత మేలు
జడిసి వుండిన నీతో చనవు చెప్పుటకంటే
తడతాఁకులఁ బొరలే తడవకు మమ్మును
చ. 3: కపటాలు సేసే నిన్ను కాఁగిలించుకొనుకంటే
నెపముతో నూరకుండే నీటే మేలు
యిపుడె శ్రీవెంకటేశ యేకమై నన్నుఁ గూడితి
తపము ఫలించె నిఁకఁ దడవకు మమ్మును
