ఈ పుట అచ్చుదిద్దబడ్డది
రేకు: 0352-3 శ్రీరాగం సంపుటం: 11-309
పల్లవి: ఏఁటికి జాగులు సేసే రింకా మీరు
చాటి చెప్పి పతి నిట్టె జరయరమ్మా
చ. 1: వలచినవలపులు వనితమేనిమీఁదికి
పులక లై మొలచె నిప్పుడు చూడరే
యెలమిఁ గాఁక లనేటియెన్నులు వెళ్ళక తొల్లె
నెల వై చలిమందులు నించరమ్మా
చ. 2: చిత్తములో చింత లెల్ల చెమట లై సతిమేన
జొత్తులు గారఁగఁ జొచ్చె జూడరె యిది
యెత్తనతమకముల యేరులు వారక తొల్లె
వొత్తి పువ్వుఁబొట్లాల నొగిఁ గాఁచరమ్మా
చ. 3: కడ లేనిజవ్వనము కలికి నిట్టూరుపులై
విడువక చెలరేఁగి వేఁచఁ జొచ్చెను
తొడరి విరహ మనేదుమ్ములు రేఁగక తొల్లె
అడరి శ్రీవేంకటేశుఁ డాదరించె నమ్మా
