ఈ పుట అచ్చుదిద్దబడ్డది
రేకు: 0350-2 పాడి సంపుటం: 11-296
పల్లవి: ఇయ్యకొన వద్దా నీ వింతట నైనా
అయ్యో యైమయ్యి నీకు ఆసపడీఁ జెలియా
చ. 1: చెక్కుల జవ్వాది జార చిరునవ్వు మోవిఁ దేర
నిక్కి చూచి మోహించె నీకు నల్లదె
చక్కని యా లలితాంగి సారె సారె మాఁటలలో
మక్కువ వలపు చల్లీ మదనరాగమునా
చ. 2: తను వెల్లఁ జెమరించి తరిపులకలు నించి
మనసు నీ కప్పగించి మలసీ నదె
అనుఁగుఁబాయపుసతి ఆడనుండి సన్న సేసి
తనుఁ దానె కరఁగీని దప్పి దేరే మోవిని
చ. 3: ముచ్చట సిగ్గులు వీఁగ ముక్కున నూర్పులు రేఁగ
యిచ్చటికి విచ్చేసె నింతలో నాపె
పచ్చిగా శ్రీవెంకటేశ పడఁతి నిన్నిటు గూడి
తచ్చన నీతో నాడీ తమకపురతులా
