ఈ పుట అచ్చుదిద్దబడ్డది
రేకు: 0347-5 నాదరామక్రియ సంపుటం: 11-281
పల్లవి: ఏమి సేసినాఁ జెల్లురా యీవేళ నీకు
కామించి నీకుఁగా నేను కడు వలచితిరా
చ. 1: వొల్లనివాఁడ వై వుండీ వొక్కొక్క నెపము వేసి
కల్లయలుకలు గాఁ గాటారించేవు
చెల్లు లేరా నీకు నిది సేన సతులు గలరు
వెల్లవిరి నొక్కతెనె వెఱ్ఱి నైతి నేనరా
చ. 2: యెందు వోఁ దలఁచితివో యెదో పని గడించుక
విందువలెఁ బోయే నంటా వేగిరించేవు
నింద లేదురా నీకును నీ విట్టె మగవాఁడవు
అంది పొంది నేనె నీకు ఆల నైతిఁ గదారా
చ. 3: చేరి నన్ను భ్రమించి నాచిత్తము చూడ వలసి
వారి వీరిఁ జూపి నాకు వాసి రేఁచేవు
యేర శ్రీవెంకటేశుఁడ యిట్టె నన్నుఁ గూడితివి
ధారుణి నీ రప మాయ తగు లైతిఁ గదరా
