ఈ పుట అచ్చుదిద్దబడ్డది
రేకు: 0346-4 శంకరాభరణం సంపుటం: 11-274
పల్లవి: లెస్స బుద్ది చెప్పరే లేమ లిందరుఁ గూడి
వుస్సు రస్సు రనఁగానె వొద్దికి నేఁ బోదునా
చ. 1: పై పై నవ్వేవారితోడ పలుకఁగ వచ్చుఁగాక
కోపగించఁగా కూరిమి గొసరఁగ వచ్చునా
యేపున రమణుఁ డయితే యెదురు రా నైతి నంటా
ఆఁప లేక తిట్టఁగాను అండకుఁ బిలుతునా
చ. 2: వలచినవారితోడ వా దైన నమరుఁ గాక
యిలఁ బగవారితోడ యిచ్చకము చెల్లునా
కులికి యప్పుడు నేను గోరు దాఁకించితి నంటా
అలిగేటివానికే ఆకుమడి చిత్తునా
చ. 3: ఆదరించేవారితోడ నంటి పొందవలెఁ గాక
గోదిలేటి మగవాని కొంగు వట్ట వచ్చునా
యీదెస శ్రీవెంకటేశుఁ డింత నేసి నన్నుఁ గూడె
పాదుకొని వుండఁగాను పంత మిచ్చే నందునా