ఈ పుట అచ్చుదిద్దబడ్డది
రేకు: 0330-5 కాంబోది సంపుటం: 11-179
పల్లవి: చింతలఁ జిగురులు చెనకులఁ జేఁగలు
వంతల నీ చలుములు వద్ద యిఁకను
చ. 1: చెలి నీ సిగ్గు లివిగో సెలవి వెన్నల గాయ
యెలమి బొమ్మలజంకె యెండ గాసీనె
వలచి విభుఁ డిందుకే వాడుచు వాడుదేరీని
కలువ చూపు లయినఁ గప్పవే మీఁదను
చ. 2: మాటలతేనెలోన మధురము గురియఁగ
గాఁటపు నీ బిగువులు కార మయ్యీనె
వీఁటనె విభుఁ డిందుకు వీఁగీని లోఁగీని
పాటల రాగాల చిలుపా లైనఁ బోయవే
చ. 3: కాంత నీ కాఁగి లనేటి కమ్మఁబూఁదీగెఁ బొదిగీ
యింత నీ ముండ్లగోళ్లనేల వొత్తేవే
పంతపు శ్రీవెంకటాద్రిపతి యిట్టె నన్నుఁ గూడె
అంతలో మెత్తనివినయము లైనఁ జేయవే
