ఈ పుట అచ్చుదిద్దబడ్డది
రేకు: 0328-6 సాళంగనాట సంపుటం: 11-168
పల్లవి: దూరఁ బోతేఁ గోపము దొరకు ముక్కున నుండు
వూరకే తోడుక రారే వొడఁబరచేనూ
చ. 1: అవుఁగా దనకురే ఆడినట్టె ఆడనీరే
యివల నేనే చెప్పే నిన్ని బుద్దులు
తివిరి మీ రిందాఁకాఁ దెచ్చినదే మీపాలు
అవల నంతటిమీఁద నాతడు నాపాలు
చ. 2: చేచేతఁ బెనఁగకురే సేసినట్టే సేయనీరే
యేచి నేనే సేవ సేసే నీడుకు నీడు
కాచిన మమ్మిద్దరినిఁ గదియించుట మీ పని
చూచి వానిఁ గరఁగించి చొక్కుట నా పని
చ. 3: పంత మె ట్టైనై వచ్చి బలిమి సేయకురే
మంతనాన మెచ్చు సేసే మంకు లెల్లాను
యింతలో శ్రీవెంకటేశుఁ డిదే కదే నన్నుఁగూడె
వంతులే నీకుఁ జెల్లె వాసి నాకుఁ జెల్లె
