ఈ పుట అచ్చుదిద్దబడ్డది
రేకు: 0325-6 భైరవి సంపుటం: 11-150
పల్లవి: తొల్లో నీకంటే నే దొడ్డదానవా
బల్లిదుఁడ నీవె నన్ను పాలింతువు గాకా
చ. 1: చిత్తము రా నీకు నే సేవ సేయఁ గలనా
సత్తగు నీ దయ నాపైఁ జల్లుదు గాక
నిత్తెము నిన్ను మెప్పించ నేరుతునా యే మైనా
కొత్తగా నన్నిట్టే దిద్దుకొందువు గాకా
చ. 2: యిట్టి దని నీ మహిమ యెరుఁగుదునా నేను
నెట్టన బుద్ది చెప్ప మన్నింతు గాకా
వొట్టి నీకు విన్నవించ నోపఁ గలనా నేను
వట్టి నీవే తెలుసుక పయికొందువు గాకా
చ. 3: కందువ లెరిఁగి నిన్ను కాంగిలించఁ గలనా
అందాలు సేసుక నీవే అంటుదు గాక
యిందుకే శ్రీవెంకటేశ యియ్యకొని కూడితివి
మందలించఁ గలానా మరుగుదు గాకా
