ఈ పుట అచ్చుదిద్దబడ్డది
రేకు: 0321-1 మంగళకౌశిక సంపుటం: 11-121
పల్లవి: పడుచుఁజేఁతలు గావు బాలకృష్ణుఁడు
తొడికీ మోవిపంటికె దుండగపుఁగృష్ణుఁడు
చ. 1: వెన్న చేతఁ బట్టుకొని వేలు చాఁచి వుట్లకు
సన్న చేసిఁ గదవమ్మ జాణ కృష్ణుఁడు
కన్నెలు ద న్నెత్తుకొంటె కాఁగిటిచూవులు చూపీ
యెన్నిట తా నసకాడె యీ కృష్ణుఁడు
చ. 2: అంకెల దొంగెడు తానె అందపుచూపులు చల్లీ
లంకె మగనాండ్లపై లలిఁ గృష్ణుఁడు
పొంకపుచెక్కు గీఁటితె పుక్కిట లోకాలు చూపీ
సంకె లేక యశోదకు సటకాఁడు కృష్ణుఁడు
చ. 3: గొల్లెతలు ముద్దాడితె గురుతు లెల్లా నించె
చల్లచాడెలకాడనె సరి గృష్ణుఁడు
అల్ల శ్రీవెంకటాద్రిని అదె తుంగభద్రదరి
కొల్లలుగా వరా లిచ్చీ గోవిందకృష్ణుఁడు
