ఈ పుట అచ్చుదిద్దబడ్డది
రేకు: 0319-6 సౌరాష్ట్రం సంపుటం: 11-114
పల్లవి: ఏలినవాఁడవు నేవె యే మయ్యా
మేలు నాకు నీవల్ల మీఁద కిక్కి లయ్యా
చ. 1: అందగారి మాట లెల్ల నాడి నన్ను నమ్మించి
కందువకుఁ దీసితివి గదవయ్యా
చెందమ్మిరేకులవంటి చేరఁడేసి నా కన్నుల
కిందు కెల్ల గురి యైతి విఁక నీ చిత్త మయ్యా
చ. 2: యింట నూరకుండేదాన నెలయించి నవ్వించి
గంటి సేసితివి మోవి గదవయ్యా
గొంటరి నా చనుఁబువ్వు గుత్తుల పూజలకును
నంటున లో నయితిని నాఁడె కదవయ్యా
చ. 3: కోరి నీవు కాఁగిటిలో గూడినచనవు లెల్ల
గారవానఁ చెల్లించితి గదవయ్యా
యీరీతి శ్రీవేంకటేశ యెనసి నా చిత్తమనే
వూరిలో నెలకొంటివి వొడఁబాటే అయ్యా
