ఈ పుట అచ్చుదిద్దబడ్డది
రేకు: 0318-2 దన్నాసి సంపుటం: 11-104
పల్లవి: నీవు చేసినది చేఁత నీకు నడ్డమాడ నేను
పావన మైతిని నీపాలిదాన నేను
చ. 1: యిందరు నెరఁగ నన్ను నిటు మన్నించిన నీవు
మందలించి యిఁక వేరె మానఁ బొయ్యెవా
పొందిన నా పొందు లివె పూఁచి నా మన సుండఁగ
సందేహ మింక నేల సత మైతి నేను
చ. 2: కావలె ననుచు నన్నుఁ గైకొన్నఁవాడవు
వేవేలైన దగ విడిచేవా
నీ వేలివుంగర మిదె నేఁడు నాచేఁ జిక్కినది
దావతి యిఁక నేఁటికిఁ దగు లైతి నేను
చ. 3: కచ్చుపెట్టి నీవు నన్నుఁ గాగిలంచినవాఁడవు
యిచ్చకమె నేతు గాక యెర వయ్యేవా
నిచ్చలు శ్రీవెంకటేశ నీకూటమి నాకు నబ్బె
మచ్చుమాయ లిఁక నేల మరిగితి నేను
