ఈ పుట అచ్చుదిద్దబడ్డది
రేకు: 0038-4 శ్రీరాగం సంపుటం: 06-158
పల్లవి:
పువ్వుల వలన నార పొదలి తలకెక్కిన
ట్లెవ్వరును నినుఁ గూడి యేపు మిగులుదురు
చ. 1:
చెలియకీ పెనుఁదురుము చీకటే వెలుఁగాయ
కలికి కనుఁగొనల తొలుకరి మెఱుపులా
వలనైన తెల్లగల వారి సంగడి నున్న
మలిన దేహులు కాంతి మహిమఁ జెందుదురు
చ. 2:
లేమకీనెన్నడిమి లేమే కలి మాయ
మోమునకు నెగురు కుచముల బరువున
కామించి పేదలును గలవారికడ నున్న
వేమారు సంపదల విఱ్ఱవీఁగుదురు
చ. 3:
జలజాక్షి చిత్తచంచలమే తిర మాయ
కెలసి నిన్నిట్ల కౌఁగిటఁ గలయఁగా
వెలుఁగొందు నిశ్చలులు వేంకటేశ్వరుఁడ నీ
చెలిమి వెడమ మతులైన సిరులఁ జెందుదురు