ఈ పుట అచ్చుదిద్దబడ్డది
రేకు: 0242-5 నాదరామక్రియ సంపుటం: 08-251
పల్లవి:
ఇంకా నేమిగావలె నిట్టె ఆనతివయ్య
జంకించఁగాని నీసలిగె చూపెను
చ. 1:
మతకము నేరఁగాని మంతనాన నీతోను
చతురతమిగులఁ గొర నేరుతు
బతిమాలనోపఁగాని పంతపు నీరతివేళ
నితవై నీచెప్పినట్టు యేమైనాఁ జేసేను
చ. 2:
వాదించరాఁగాని వన్నెలుమెరసి నీతో
ఆదిగొని సరసము లాడవచ్చేను
సాదించవద్దుగాని చల్లని నీకాఁగిటిలో
సాదువలె నీకతలు సమ్మతించేను
చ. 3:
కోపగించఁగాని నిన్నుఁ గూరిమి శ్రీవెంకటేశ
కాఁపురము సేసి నీపక్కనె వుండేను
యేపున బింకము లేల యిట్టె నన్నుఁ గూడితివి
తీపుల మోవిమాటలఁ దేనె వూసేను
