ఈ పుట అచ్చుదిద్దబడ్డది
రేకు: 0241-5 శుద్దదేశి సంపుటం: 08-245
పల్లవి:
కాఁతాళించి వున్నది నీకడ సుద్దులెల్లా విని
చేఁతలేమిఁ జూపక చేరి వూరకుండుమీ
చ. 1:
వనిత నీచిత్తము రావలసి యిందాఁకాను
వొనర నన్నిమాఁటలు నోరిచెఁగాని
చెనకి నీవె యిఁక చేతులెత్తి మొక్కినాను
కొనచూపుటలుగులఁ గుచ్చి యెత్తుఁ జుమ్మీ
చ. 2:
అతివ నిన్ను మెప్పించె అందుకొర కిందాఁకాను
చతురత మోనములు జరపెఁగాని
యితవుగా నీవె యిఁక నిచ్చకము లాడినాను
రతిరాజు గుఱ్ఱాల నోరనే తోలుఁజుమ్మీ
చ. 3:
చెలి నీవు గూడిన యీసిగ్గున నిందాఁకాను
మొలకనవ్వులు లోలో మొరఁగెఁగాని
నెలవై శ్రీ వెంకటేశ నీవె యెంతవేఁడుకొన్నా
తలిరు మోవిపైని ముద్రలు వెట్టుజుఁమ్మీ