ఈ పుట అచ్చుదిద్దబడ్డది
రేకు: 0233-3 భైరవి సంపుటం: 08-195
పల్లవి:
మఱి యేమి సేసునే మంచివే యన్నిపనులు
వెఱపులెల్లాఁ దీర వేఁడుకొనీఁగాక
చ. 1:
ఆసగలిగినవాఁడు ఆతఁడు నీయడకును
వేసరునా మీఁద మీఁద వేడుకేకాక
రాసికెక్క నంతేసి రతి నలయింతువట
మోసపోయీనా నీకు మొక్కేఁగాక
చ. 2:
పైపై వలచినవాఁడు పంతపు నీచేతలకు
కోపగించునా మరిఁ గోరేదేకాక
తీపుమోవితేనెలిచ్చి తెలిపి చొక్కింతువట
వోపననినా నిన్ను వొడఁబరచీఁగాక
చ. 3:
కాఁగిటఁ గూడినవాఁడు కడు నీచెనకులకు
లోఁగీనా యెంతైనా లోఁగొనీఁగాక
చేఁగదేరఁ గూడితివి శ్రీ వెంకటేశ్వరునట
దాఁగీనా నీ యింపులకుఁ దమకించీఁగాక