బవరమునఁ జొచ్చి పొడువని బంటుచేతి దాయుధంబైననేమి తెడ్డయిననేమి మదరిపువిఫాల మునిజనహృదయలోల వేణుగోపాల భక్తసంత్రాణశీల!
ఎనుబోతు వానకు జంకునా యెంతైన వెలహెచ్చుగల తేజి వెఱచుఁగాక గుణహీనుఁడెంతైన గులముకు వెఱచునా గుణవంతుఁ డెప్పుడు వెఱచుఁగాక గడుసైన పెనుమొద్దు గాలికి వెఱచునా విరుగఁగాచిన మ్రాను వెఱచుఁగాక ఱంకుముండ బజారురచ్చకు వెఱచునా వీరపతివ్రత వెఱచుఁగాక ఘనతగల్గిన దొరబిడ్డ గాక సుకవి నోటితిట్లకు వెఱచునా మోటువాడు మదరిపువిఫాల మునిజనహృదయలోల వేణుగోపాల భక్తసంత్రాణశీల!
ఏదంబులకు మంగలెంకఁడే దగునేటు ప్రశ్న సెప్పను మాల పాపిగాఁడు కయితముల్ సెప్ప బోగము చినెంకఁడె సరి సంగీత యిద్దెకు సాకలెల్లి చాత్రపురండాల సాతాననంతమ్మ సిందులు ద్రొక్క దాసరి పెదక్క యీణె గొట్టను కోమటీరేశమే సరి మతి రతాలకు మాఱుమనుము లచ్చి అనుచు మూర్ఖాళి యీ రీతి ననుదినంబు భూతలమునందు వచియింత్రు నీతిలేక మదరిపువిఫాల మునిజనహృదయలోల వేణుగోపాల భక్తసంత్రాణశీల!