ఒంటిజందెము ద్వాదశోర్ధ్వపుండ్రంబులు నమరిన పసపు కృష్ణాజినంబు దండంబు గోచి కమండలు వక్షమా లిక పుస్తకంబు పాదుకలు గొడుగు దర్భ మౌంజీ పవిత్రములు కటి కరాన చెవిలోనఁ దగు తులసీదళంబు వేదమంత్రములు వినోదమౌ నపరంజి పడగకుండలములు పంచశిఖల తో నరుగుదెంచి బలిని భూదాన మడిగి తెచ్చి సురపతి కిచ్చితి విచ్చతోడ మదరిపువిఫాల మునిజనహృదయలోల వేణుగోపాల భక్తసంత్రాణశీల!
కనుముక్కుతీరు చక్కనికాంతి పొందిన శుభలక్షణంబులు సూక్ష్మబుద్ధి ఘనత వివేకవిక్రమము బాంధవ్యంబు మర్మవిలాసంబు మానుషంబు సరసవాచాలత సాహసం బొకవేళ విద్యావిచక్షణ విప్రపూజ వితరణగుణము భూపతియందు భయభక్తి నీతియు సర్వంబు నేర్చునోర్పు స్నానసంధ్యాద్యనుష్ఠానసంపన్నత గాంభీర్యము పరోపకారచింత గలుగు మంత్రిని జేర్చుకొన్నట్టి దొరకుఁ గీర్తి సౌఖ్యము సకల దిగ్విజయము సిరి గలుగుచుండును దోషము ల్దొలగిపోవు మదరిపువిఫాల మునిజనహృదయలోల వేణుగోపాల భక్తసంత్రాణశీల!