సంగ్రహ ఆంధ్ర విజ్ఞాన కోశము/మూడవ సంపుటము/ఛాయాగ్రహణ శాస్త్రము (Photography)
ఛాయాగ్రహణ శాస్త్రము (Photography) :
కాంతిచేత గాని, మరి యేవిధమైన వికీర్ణ (Radiant) శక్తిచేత గాని, రసాయనిక మార్పులు కలిగి బింబము (image) ఏర్పడుట ఛాయాచిత్రణ మనబడును.
ఛాయా చిత్రగ్రహణ విధానము : కాంతి చొరుటకు వీలులేని పెట్టెకు అమర్చిన కటకము (Lens) ద్వారా ఒక వస్తువునుండి వచ్చు కాంతి ఆ పెట్టెలో గల కాంతి ప్రేరిత (Light sensitive) పదార్థము పూయబడిన కాగితము మీద గాని, గాజు పలకమీద గాని పడును. కాంతి ప్రేరిత పదార్థములు సాధారణముగా రజత హేలైడ్లు (Silver halides) అయి యుండును. కటకమునకు ఒక మూత (Shutter) అమర్పబడి యుండును. దీనిని పూర్తిగా మూసియుంచుటకు గాని, పూర్తిగా తెరచి యుంచుటకు గాని, ఒక నిర్ణీత కాలము తెరచియుంచుటకు గాని, అవకాశ ముండును. దీని వెనుక కనుపాప వంటి పటలము (Diapharagm) ఉండును. దీనిలో మధ్య గల రంధ్రముయొక్క వైశాల్యము మార్చుట వలన కాంతి ప్రసరణము హెచ్చించుటకు, తగ్గించుటకు వీలుండును.
రజత హేలైడ్ (Silver halides) మీద కాంతి పడినప్పుడు కాంతి ప్రేరిత పదార్థమును వికాసకము (Developer) నం దుంచవలెను. అందు రజతహేలైడ్లు లోహ రజతమై (Metallic silver) చిన్న కణములుగా మారుటవలన కాంతి ప్రసరించిన ప్రదేశములు నల్లగా మారును. పిదప నా పదార్థమును స్థిరకారకము (Fixer)లో నుంచవలెను. దానివలన కాంతి ప్రసరించని ప్రదేశములలోగల కాంతి ప్రేరిత పదార్థములను అది జీర్ణించు కొనును (Dissolves) పిదప ఆ కాంతి ప్రేరిత పదార్థ మును కడిగి ఆరపెట్టవలెను. ఆ పరిస్థితిలో కాంతి ప్రేరిత పదార్థముమీద కాంతి పడిన ప్రదేశములు నల్లగాను, వస్తువులో కాంతి ప్రసరింపని ప్రదేశములు తెల్లగాను కాన్పించుటచే దీనిని 'నెగటివు' (Negative) అందురు.
నెగటివును మరొక కాంతిప్రేరిత పదార్థము పూయ బడిన పలకపై గాని కాగితముపైగాని ఉంచి కాంతి ప్రసరింప చేసినచో నెగటివ్‌లో గల నల్లని అపారదర్శక (Opaque) ప్రదేశముల గుండా కాంతి ప్రసరింపక, పారదర్శక (Transparent) ప్రదేశములగుండా కాంతి ప్రసరించును. ఆపై వికాసము (Developing), స్థిరీకరణము (Fixing) జరుపవలెను. అప్పుడు కాంతి ప్రసరించిన ప్రదేశములు తెల్లగాను, కాంతి ప్రసరింపని ప్రదేశములు నల్లగాను కనిపించి, వాస్తవ చిత్రము సిద్ధమగును. దానిపై గోచరించు నల్లదనము యొక్క సాంద్రతా సాంద్రతలు నెగటివులో ఆయాప్రదేశముల గుండ ప్రసరించిన కాంతి మీదనే ఆధారపడి యుండును.
చరిత్ర : క్రీ. శ. 1727 లో జె. హెచ్. సూల్జ్ (J. H. Schultze) సుద్దను (chalk), రజతనత్రితమును (Silver nitrate) కలిపిన మిశ్రమము మీద అపారదర్శక పదార్థముల నుండి కాంతిని ప్రసరింపజేయగా మిశ్రమము మీద బింబములు కలుగునని మొదటిసారిగా కనుగొనెను. క్రీ. శ. 1777 లో సి. డబ్ల్యు. స్కీల్ (C. W. Scheele) రజతమిశ్రమముల (silver compounds) మీద వివిధ వర్ణములగు కాంతుల వలన ఏర్పడు ప్రభావమును పరిశోధించెను. 1802 లో టి. వెడ్జివుడ్ అను నాతడు రజత నత్రితములో ముంచిన కాగితముల మీద బింబములు కలిగించు శక్తి కాంతికి గలదని నిరూపించెను. తరువాత హెచ్. డారి (H. Darry) రజతనత్రికము కంటె రజత హరితము (silver chloride) శ్రేష్ఠమైనదని కనుగొనెను. 1814 లో జె. ఎన్. నీపీ (J. N. Niepie) మట్టి తైలము (Bitumen) రసాయనిక సంయోగానంతరము రజత లోహములవలె కరుగకపోవుట మూలమున కాంతి ప్రేరిత పదార్థములకు దీనిని పీఠము (Base) గా ఉపయోగింప వచ్చునని గ్రహించెను. 1839 లో ఎన్. జె. ఎం. డా గెరి (L. J. M. Daguerre) మెరుగుపెట్టిన వెండి పలక మీద రజత అయొడయిడు (silver iodide) పొరను అయొడిన్ ఆవిరులకు తెరిచి (expose) కెమెరాలోనుంచి కాంతి ప్రసరింప జేసెను. దానిని పాదరసపు ఆవిరులకు తెరిచి యుంచినచో బింబము వికసించునని నిరూపించెను. దీనిని డాగుర్సు (Dagurrs) రకపు ఛాయాగ్రహణ మందురు.
1841 లో డబ్ల్యు. ఎచ్. ఫాక్సు టాల్బటో (ఇంగ్లండు) రజతహరితము (silver chloride) పూసిన కాగితముల ఉపయోగములనుగూర్చి పరిశోధించి, కాలోటైపు(calotype) పద్ధతి ప్రవేశ పెట్టెను. దీనిలో నాతడు స్థిరీకరణము ప్రవేశ పెట్టెను, 1839 లో సర్ జె. హెర్షెల్ (Sir J. Herschel) మొదటిసారిగా ఛాయా చిత్రమును తీసి విజయమును సాధించెను. షెవలియర్ (Chevalier) ఒకేకటకముతో అతిసామాన్య మైన కెమెరాను 1840 లో పెడ్జెవల్ (Petzval), పోర్ ట్రైట్ లెన్సును (portrait lens), 1890 లో బిందుకటకము (Anastigmatic lenses) లను రడోల్ఫు, అబ్బె అనువారలు తయారు చేసిరి. 1882 లో ఎడ్వర్డ్సు (Edwards) సమతల సంగమ కవాటము (Focal plane shutter) ను, 1887 లో బాన్సచ్ (Bansch) కటకమధ తారామండల పటలము (iris diaphragm) ను ప్రవేశ పెట్టిరి. 1843 లో గాజు పలకమీద నెగటివులు తయారు చేయుట, 1845 లో హెర్షెల్ (Herschel), సి నీపి డి సెయింట్, (C. Niepce de St.), విక్టరు (Victor) అనువారలు రజత లవణములను ఆల్బుమెన్ మిశ్రితముగా గాజు పలకమీద పూయుట కనుగొనిరి. 1871 లో ఆర్ . ఎల్, మాడాక్సు (R. L. Maddox) రజత బ్రోమైడ్ జెలటిన్‌ను కాంతి ప్రేరితముగా ఉపయోగించెను. 1874లో మొదటి అనార్ద్రములగు నెగటివులు తయారు చేయబడెను. 1904 నాటికి వర్ణ ఛాయా చిత్రములు కనుగొన బడినవి. 1889 లో ఈస్టుమాన్ (Eastman) రజత బ్రోమైడ్ పూసిన ఫిల్మును తయారుచేసెను. ఇట్లే ఈ కళ క్రమవికాసమును చెంది, నేడు మనము గాంచు పరిణత స్థితి నందు కొనినది.
కెమేరాలు : సాధారణపు పెట్టె కెమేరాలలో ఒక చివర ఫిల్ము, మరియొక చివర F/10 కటకము ఉండును. కవాటము 1/25 సెకండు కాలము తెరచుకొని యుండగలదు. మడత కేమేరాలలో కటకము తిత్తుల చివర ఉండును. దీని వలన అవసరము లేనప్పుడు దగ్గరకు నొక్కి వేయ వచ్చును. రిఫ్లెక్స్ కెమేరాలలో 45° కాంతి అక్షమునకు అద్ద ముండుట వలన బింబమెట్లుండునో చూడవచ్చును. దృశ్య దర్శిని (View finder) మూలముగా బింబమెంత పడునో తెలియును. దూర మానిని (Range finder) మూలముగా వస్తువునకు కెమేరాకును గల దూరము తెలియును. కెమేరాలకు కృత్రిమ కాంతి సాధనములు, కలరు ఫిల్టరులు కూడ సహాయ కారులుగ నుండును.
చిత్రము - 225
పటము - 1
కాంతి ప్రేరిత పదార్థములు : విలోయ (Soluble) రజత లవణములలో (సాధారణముగా రజత నత్రితము) విలోయ హేలైడ్ లవణములను మిశ్రమము చేసినచో నీటిలో కరుగని మిశ్రమ మొకటి ఏర్పడును. దీనిలో జలటిన్ కలిపిన యెడల అది హేలైడ్ లవణ కణములు ఒకదాని కొకటి అతుకుకొని పోకుండ విడివిడిగా నుంచి భద్రపరచును. ఈ విక్షి ప్తలేపనము (Dispersed paint) యొక్క గుణములు దానిలో నుండు మిశ్రమముల యొక్క పరిణామములమీదను, తయారుచేయు విధము మీదను ఆధారపడి యుండును. బ్రొమైడ్, ఆ యొడయిడ్ లవణముల మిశ్రమమున్న పూత అన్నిటి కన్న ఎక్కువగా కాంతి ప్రేరితమగును. ఇంకను ఎక్కువ సూక్ష్మగ్రాహ లేపనములను తయారు చేయవలె ననినచో జెలటినును కొద్దిగా వేడి చేసిన చాలును. అది రసాయనిక మార్పులు చెంది సూక్ష్మగ్రాహ శక్తిని పొందును.
ప్రతి మిశ్రమము (Emulsion) కూడ నిర్ణీతమైన (fixed) కాంతి తరంగములకు మాత్రమే ప్రేరణ (Response) పొందును. రజత క్లోరైడ్, బ్రోమైడ్, అయొడైడ్ (హే లైడ్‌ల ) మిశ్రమములను పెక్కు పాళ్ళలో (Proportions) కలిపిన దృశ్య వర్ణమాల, ఎక్స్ రేలు అతినీలలోహిత (ulter violet) వర్ణములు మొదలగువానికి ప్రేరణ చెందు ప్రేరితములను తయారు చేయవచ్చును. ఇంతేకాక నీలమునుండి ఆకుపచ్చ వరకు (600 m /) పనికివచ్చు ఆర్థోక్రోమెటిక్ (orthochromatic) రకము గాని, పూర్తి వర్ణమాలను గ్రహించు పాన్‌క్రోమెటిక్ (panchromatic) ప్రేరితముగాని తయారు చేయవచ్చును.
కాంతిచే ప్రేరితములగు ఎమల్షన్లు గాజుపలకల పారదర్శక ప్లేస్టిక్ ఫిల్ముల మీదగాని కాగితములమీదగాని పూయబడును. ఈ ఎమల్షన్‌ల క్రింద అపరివేషకము (anti-halation layer) గా రంగు పూత ఉండును. దీని వలన ఎక్కువగా కాంతి ప్రసరించిన భాగములందు పరివేషములు ( halos) కలుగవు. ఫిల్ములపై జెలటిన్ పూత పూసినచో కాంతి ప్రేరిత పదార్థము ముడతలు పడదు. ఆర్థోక్రోమెటిక్ (arthochromatic) ఫిల్ములు నీలము నుండి ఆకుపచ్చ కాంతి వరకు ప్రేరితముగా నుండుటచే ఎక్కువ రసాయనికపు మార్పులు అవసరము లేకయే బింబము స్పష్టముగా నుండును. పాన్-క్రోమెటిక్ (Panchromatic) ఫిల్ము దృశ్య వర్ణమాల కంతకును ప్రేరితముగా నుండుటచే ఏక వర్ణ చిత్రములు బాగుగా వచ్చును. వీనికి సన్నని కణములు గల ఎమల్షను పూయబడి యుండును. ఎక్సురే ఫిల్ములకు సాధారణముగా పలకకు రెండు ప్రక్కల ఎమల్ష నుండును.
ఏక వర్ణమగు ఫొటోగ్రఫిక్ కాగితములు సాధారణముగా నాల్గు రకములు. పి. ఓ. పి. కు (Printing out paper) వికాసము అక్కరలేకనే బింబము వచ్చును. గాస్ లైట్ (Gas light) కాగితమునకు రజత క్లోర యిడ్ పూయబడి యుండుటచే ప్రతిక్రియ (reaction) మెల్లగా జరుగును. కావున సన్నిహిత ముద్రణమున (contact printing) కు పనికివచ్చును. బ్రోమైడ్ ఎమల్షను గల కాగితము ఎన్లార్జిమెంటు (Enlargement) లకు ఉపయోగించును. ఛాయాగ్రహణమునకు ఉపయోగపడు కాగితములలో బ్రోమైడ్ కాగితము ఉత్తమము. క్లోరోబ్రోమైడ్ కాగితము మధ్యమము. గాస్‌లైట్ కాగితము అధమము.
వికాస విధానము (Processing) : వికాసము కాంతి ప్రేరిత మయిన రజత హేలైడ్‌ను నల్లని లోహరజతముగా మార్చును. క్షార (alkaline) ద్రావకములగు వికాసములు గాలిలో నుండి ఆమ్లజనిని (oxygen) గ్రహించి తారువంటి అనుత్తేజిత (inactive) పదార్థములను అవక్షేపించును (precipitate). కాని సోడియం సల్ఫేటు వంటి పదార్థములతో జతకూడినప్పుడు విఛూషణము (absorption) తగ్గిపోవును. ఈ క్షార పదార్థములు కాంతిప్రేరితములు కాని రజత యౌగికములను (Silver compounds) కూడ రజతముగా మార్చి వికాస ధూమిక (Development fog) తయారు చేయును. దీనివలన బింబము యొక్క స్పష్టత తగ్గును. పొటాసియం బ్రొమైడ్‌ను వికాసములో చేర్చిన, వికాస ధూమిక తయారగుటకు 'నిర్బంధకము' (restrianer) గా పనిచేయును.
అత్యుత్తమ క్రియాశక్తిగల నెగటివులకు హైడ్రోక్వినైను (Hydroquinine), కాస్టిక్ సోడా (costic soda) లను, మధ్యతరగతికి ఎలన్ (Elon), పి- మెతిలా మినోఫీనల్ సల్ఫేటు (p-Methylaminophenol Sulphate), హైడ్రో-క్వినైను (Hydroquinone) లను, మరీ తక్కువ క్రియాశక్తి (low activity) గల వాటికి (అనగా ఎన్‌లార్జిమెంటుకు పనికివచ్చునవి, సినీ ఫిల్ములు) ఎలన్ (Elon) హైడ్రో-క్వినైను (Hydroquinine), అనార్ద్రమగు సోడియం సల్ఫేట్, బొరాక్సు గల ద్రావకమును, వికాసముగా నుపయోగింతురు. తక్కువ క్షారము గల వికాసము నుపయోగించిన, నెగటివులలో మచ్చలు ఉండక తేడాలను (unevenness) తగ్గించును.
ఫిల్మును వికాసములో నుంచిన ప్రేరణ సమయము (induction period)లో బింబము (image) తయారయి క్రమముగా ఒక స్థాయికి వికసించును. ఉష్ణోగ్రతతో (temperature) ఈ వికాసగతి (rate) వృద్ధి చెందును. కాని సాధారణముగా 18° – 20°C (65° - 70F) ఉష్ణము దీనికి మంచిది. వికాసము, కదలుచున్న అదే కాలములో బింబముయొక్క భేదదర్శనము (contrast) బాగుగా నుండును.
స్థిరీకరణ ప్రక్రియ (fixing) లో కాంతి తగులని రజిత హేలైడులు సోడియం సల్ఫయిడు (హైపో) లో కరుగును. హైపోలో ఆమ్లములు ఏమియు లేకపోయినచో ఈ కరిగిన లోహరజతము అవక్షేపము (precipitate) చెందును. స్థిరకారకములలో పదను (tanning) చేసి జలటినును గట్టిపరచు పదార్థము లుండుటవలన నీటిలో జెలటిను ఉబ్బుట, తగ్గుట, ద్రవీభవనాంశము (melting point) వృద్ధిచెందుటయు జరుగును. దీనివలన త్వరగా ఆరి రాపిడి వలన ప్రేరిత పదార్థము తుడుచుకొని పోదు.
స్థిరీకరించిన పిదప బింబములు చాల తేలికగా గాని, బండగా గాని (light on heavy) వచ్చినచో కొంతమార్పు చేయవలసి యుండును. వృద్దికారకము' (intensifiers) అదనముగా కాంతి విచూషణ పదార్థము (light absorbing material) ను పరుచుట కాని, కాంతిని విచూషించు శక్తిని నెగటివుకు వృద్ధిపరచుట గాని చేయును. పాదరస వృద్ధికారకము లోహరజమును రజిత బ్రోమైడ్‌గా మార్చి, తానే అద్రావ పాదరస వృద్ధికారకము (Insoluble Mercurous Bromide) గా తయారగును. రజత వృద్ధికారకము (silver intensifier)లో స్థిరీకరించిన పిదప నెగటివును రజత వృద్ధికారకములో ముంచినచో, రజత లోహపు పూతదానిపై నేర్పడును. దాని వలన భేద దర్శన మధిక మగును.
ఛాయాచిత్రణ సంగ్రహీకరణములు (photographic reducers) సాధారణముగా ఆమ్లకారకములై (oxidising agents), రజతద్రావము (silver solvent) లు కలిగియుండును. దీనివలన బింబములో అదనపు లోహరజతము కలిగి యుండును.
వాస్తవ చిత్రములకు (positives) కావలసిన రంగు (tone) కలుగుటకు స్థిరకారకమగు సోడియం ధయో సల్ఫేటు (హైపో)లో పొటాస్ పట్టికల (potash alum)ను కలపిన వేడి ద్రావకములో పాజిటివు (positive) లను ముంచినచో లోహరజతము రజత సల్ఫైడుగా మారి గోధుమఛాయ (Brown) వచ్చును. పొటాసియం ఫెర్రి సయనైడు, పొటాసియం బ్రొయనైడుగా మారును. దీనిని సోడియం సల్ఫయిడు ద్రావకములో గాని, ఇతర అకర్బన (inorganic) రసాయనికములలో గాని ముంచిన, నీలముగాగాని, ఎర్రసుద్ద (Red chalk) గా గాని మార్చ వచ్చును.
వర్ణ ఛాయాచిత్రము (Colour Photography) : ప్రకృతిలో కనిపించు రంగు లన్నియు ఎరుపు, ఆకుపచ్చ, నీలము (Blue) రంగుల కలగలుపులే. ఏదైన వస్తువు నుండి వచ్చు కాంతి విడిగా యీ మూడు రంగుల కలర్ ఫిల్టరుల (Colour Filters) గుండా పోనిచ్చి వికాసము చేసినచో వర్ణచిత్రములు వచ్చును. ఈ క్రియ రెండు విధములు.
వర్ణ మిశ్రమ అనుసంధాన విధానము (Additive colour synthesis) : దీనిలో ఫలకముపై కాంతిప్రేరిత ఎమల్షనుమీద సూక్ష్మమైన రంగు ఫిల్టరులు సమముగా పరచబడి యుండును. కెమేరాముందు వరుసగా విడి విడిగా ఎరుపు, ఆకుపచ్చ, నీలపు ఫిల్టరులు ఉంచి కాంతిని పోనిచ్చి వికాసములో నుంచవలెను. ఎరుపు ఫిల్టరునుఉంచి కాంతిని పోనిచ్చినప్పుడు, ఎర్రని కిరణములక్రింద గల ఎమల్షనుకు మాత్రమే కాంతి తగులును. ఈ విధముగా వస్తువు నుండివచ్చు రంగునుబట్టి ఈ కణములక్రింది ప్రేరితముమీద కాంతి పడును. పిదప తెల్లనికాంతికి ఎదురుపరచి నెగటివును తిరిగి వికాసకములో నుంచి స్థిరీకరింపవలెను. అప్పుడు పారదర్శక మగు ఈ ఫలకముగుండా చూచినచో సరళ మగు వర్ణచిత్ర మగపడును. డూఫే (Dufay) వర్ణ పద్ధతిలో రంగులు కల పీఠము మీదను, ఆగ్ ఫా (Agfa) పద్ధతిలో రంగుల రెజిన్ కణములు అతికించుట వలనను ఈ వర్ణచిత్రము లేర్పడును.
రంగుల పాజిటివులు : రంగుల పాజిటివులలోని ఎమల్షనులో తక్కువ ద్రవీభవనాంశము గల (low melting point) జెలటిను, రజత హేలైడు ఉండును. ఎమల్షనునకు కాంతి ప్రసరింపజేసి, వికాస మొనర్చి, స్థిరీకరింపజేసి వేడినీటిలో కడిగినచో అందు కాంతి తగిలిన చోట్ల జెలటిన్ మిగిలి, ఇతర ప్రదేశములలో అది కరగిపోవును. తరువాత కావలసిన రంగులో ముంచినచో కాంతి తగిలిన ప్రదేశములలో గల జెలటినులో ఆ రంగు ప్రవేశించును. పైన చెప్పిన మూడు రంగులలో అట్లే రంగుల ఎమల్షనులను తయారుచేసి, వాని నొకదానిపై నొకటి పేర్చి అంటించినచో ఒక సంపూర్ణ వర్ణచిత్ర మేర్పడును. దీనిని డై ట్రాన్సుఫరు (Dye tranfser) అని కాని, టెక్ని కలర్ (Techni Colour process) అనిగాని అందురు.
చిత్రము - 226
పటము - 2
ట్రైపాక్ విధానము (Tripack Method) : దీనిలో ఒకే పీఠముపై వరుసగా ఎరుపు, ఆకుపచ్చ, నీలము అను
రంగులచే ప్రేరితములగు ఎమల్షను లుండును. కోడా క్రోము పద్ధతిలో 'వర్ణబంధములు' (Colour couplers)
అను రసాయనము వలన కాంతి ప్రసరించిన ప్రదేశములలో రజత హేలైడ్ యొక్క ఆమ్లీ కరణము మూలముగా కరుగని రంగు పదార్థ మేర్పడును. కాని కోడా కలరు (Koda colour, Anscoclor, Agfa colour) పద్దతులలో వికాసములో నుంచిన పిదప ఈ వర్ణ బంధముల నుపయోగింతురు. దీనివలన వర్ణ సంకరము కొంత తగ్గును.
ఉపయోగములు : ఉత్సాహవంతులగు ఛాయా చిత్రకారులు ఈ విశ్వమందలి ప్రతి వస్తువును, తచ్చర్యలను, ఛాయా చిత్రములుగా తీయ ప్రయత్నించుట ప్రపంచ మంతట కాంచు చున్నాము. చలన చిత్ర పరిశ్రమలు, వార్తా పత్రికలు, వ్యాపార సంస్థలు ఛాయా చిత్ర కళను వినోద, విజ్ఞాన ప్రదానములకే గాక, ఆర్థిక లాభాదులకు గూడ నేడు ఉపయోగించుకొను చున్నవి. సినీ కెమేరా ద్వారా నేటి మానవుడు అచర జగత్తుతో పాటు జంగమ జగత్తును సహితము చిత్ర రూపమున తీసి వాని గమన విశేషముల ప్రదర్శింప గల్గి యున్నాడు. ఫొటో మైక్రాగ్రఫీ వలన సూక్ష్మాతి సూక్ష్మపదార్థములను సైతము ఛాయా చిత్రమున దర్శింప జేయుటకు వీలగు చున్నది. పరిణామాధిక్యము గల ఉద్గ్రంథములను నెగటివుల రూపములలో అల్ప పరిమాణ రూపములుగా రూపొందజేసి వహన యోగ్యములుగను, అనల్పకాల జీవన యోగ్యములుగను చేసి మైక్రో ఫొటోగ్రఫీ గ్రంథాలయ పఠితల కెంతయో సౌకర్యము కలుగజేయు చున్నది. ఇట్లు గ్రంథములను ఫిల్ముల రూపముగా తయారు చేయుటకు ఎక్కువ విభాజకశక్తి (resolving power) గల ఎమల్షను కావలెను.
అంతరిక్ష ఛాయా చిత్రగ్రహణము నేటి విజ్ఞాన పరిశోధనల కెంతయో యుపకరించుచున్నది. దీనికి పనికివచ్చు కెమేరాలో రెండు కటకము లుండును. వస్తుకాచము (objective glass) వెనుక, పుటక కటక ముంచుటవలన బింబము వికసించును. దీనివలన శత్రు స్థావరములను విమానములనుండి ఫొటోలు తీయుటకును, పురావస్తు శాస్త్రజ్ఞుల పరిశోధనలకును, వన్యమృగములు మున్నగు వానిని ఫొటో తీయుటకును వీలుపడును. పరమాణు విదళనము (Nuclear fission) చెందునపుడు వచ్చు శకలములు ఎమల్షన్ గుండా పోయినవాని వేగమును బట్టి, బరువును బట్టి ఎమల్షను మీద జాడ లేర్పడును. వీనివలన విజ్ఞానశాస్త్రమున కెంతయో ఉపయోగము కలదు. అంతరిక్షములోనికి బెలూన్ల ద్వారమునను, రాకెట్ల ద్వారమునను ఫొటో ప్లేట్లను పంపి విశ్వకిరణముల (Cosmic Rays) లో జరుగు ప్రక్రియలను తెలిసికొన వీలగును. ఖగోళమును ప్రతిరోజును ఫొటోలు తీయుట వలన విశ్వము యొక్క పుట్టుపూర్వోత్తరముల గురించి వివరములు సేకరింప వీలగును.
ఎక్సురే ఫొటోల మూలముగా శరీరములోని భాగములను, వాని స్థితిగతులను చూడవచ్చును. ఈనాటి వైద్య శాస్త్రమున కిది ముఖ్యాంగమని చెప్పవచ్చును. ఇట్లే పరశ్శోణ (infra-red) చిత్రముల మూలమున మబ్బు, మంచు, పొగ మున్నగువాని గుండ దూరపు వస్తువుల చిత్రములను స్పష్టముగా తీయవచ్చును.
ఒక్క మాటలో చెప్పవలెనన్న, ఛాయా చిత్ర గ్రహణ కళ చరాచర విశ్వ భౌతిక స్వరూప సందర్శనావకాశమును కల్పించు విలక్షణమైన విమల దర్పణము.
అ. స. మూ.