శ్రీమద్భాగవత పురాణము - స్కంధము 11 - అధ్యాయము 26
| ←ముందరి అధ్యాయము | శ్రీమద్భాగవత పురాణము (శ్రీమద్భాగవత పురాణము - స్కంధము 11 - అధ్యాయము 26) | తరువాతి అధ్యాయము→ |
శ్రీభగవానువాచ
మల్లక్షణమిమం కాయం లబ్ధ్వా మద్ధర్మ ఆస్థితః
ఆనన్దం పరమాత్మానమాత్మస్థం సముపైతి మామ్
గుణమయ్యా జీవయోన్యా విముక్తో జ్ఞాననిష్ఠయా
గుణేషు మాయామాత్రేషు దృశ్యమానేష్వవస్తుతః
వర్తమానోऽపి న పుమాన్యుజ్యతేऽవస్తుభిర్గుణైః
సఙ్గం న కుర్యాదసతాం శిశ్నోదరతృపాం క్వచిత్
తస్యానుగస్తమస్యన్ధే పతత్యన్ధానుగాన్ధవత్
ఐలః సమ్రాడిమాం గాథామగాయత బృహచ్ఛ్రవాః
ఉర్వశీవిరహాన్ముహ్యన్నిర్విణ్ణః శోకసంయమే
త్యక్త్వాత్మానం వ్రయన్తీం తాం నగ్న ఉన్మత్తవన్నృపః
విలపన్నన్వగాజ్జాయే ఘోరే తిష్ఠేతి విక్లవః
కామానతృప్తోऽనుజుషన్క్షుల్లకాన్వర్షయామినీః
న వేద యాన్తీర్నాయాన్తీరుర్వశ్యాకృష్టచేతనః
ఐల ఉవాచ
అహో మే మోహవిస్తారః కామకశ్మలచేతసః
దేవ్యా గృహీతకణ్ఠస్య నాయుఃఖణ్డా ఇమే స్మృతాః
నాహం వేదాభినిర్ముక్తః సూర్యో వాభ్యుదితోऽముయా
మూషితో వర్షపూగానాం బతాహాని గతాన్యుత
అహో మే ఆత్మసమ్మోహో యేనాత్మా యోషితాం కృతః
క్రీడామృగశ్చక్రవర్తీ నరదేవశిఖామణిః
సపరిచ్ఛదమాత్మానం హిత్వా తృణమివేశ్వరమ్
యాన్తీం స్త్రియం చాన్వగమం నగ్న ఉన్మత్తవద్రుదన్
కుతస్తస్యానుభావః స్యాత్తేజ ఈశత్వమేవ వా
యోऽన్వగచ్ఛం స్త్రియం యాన్తీం ఖరవత్పాదతాడితః
కిం విద్యయా కిం తపసా కిం త్యాగేన శ్రుతేన వా
కిం వివిక్తేన మౌనేన స్త్రీభిర్యస్య మనో హృతమ్
స్వార్థస్యాకోవిదం ధిఙ్మాం మూర్ఖం పణ్డితమానినమ్
యోऽహమీశ్వరతాం ప్రాప్య స్త్రీభిర్గోఖరవజ్జితః
సేవతో వర్షపూగాన్మే ఉర్వశ్యా అధరాసవమ్
న తృప్యత్యాత్మభూః కామో వహ్నిరాహుతిభిర్యథా
పుంశ్చల్యాపహృతం చిత్తం కో న్వన్యో మోచితుం ప్రభుః
ఆత్మారామేశ్వరమృతే భగవన్తమధోక్షజమ్
బోధితస్యాపి దేవ్యా మే సూక్తవాక్యేన దుర్మతేః
మనోగతో మహామోహో నాపయాత్యజితాత్మనః
కిమేతయా నోऽపకృతం రజ్జ్వా వా సర్పచేతసః
ద్రష్టుః స్వరూపావిదుషో యోऽహం యదజితేన్ద్రియః
క్వాయం మలీమసః కాయో దౌర్గన్ధ్యాద్యాత్మకోऽశుచిః
క్వ గుణాః సౌమనస్యాద్యా హ్యధ్యాసోऽవిద్యయా కృతః
పిత్రోః కిం స్వం ను భార్యాయాః స్వామినోऽగ్నేః శ్వగృధ్రయోః
కిమాత్మనః కిం సుహృదామితి యో నావసీయతే
తస్మిన్కలేవరేऽమేధ్యే తుచ్ఛనిష్ఠే విషజ్జతే
అహో సుభద్రం సునసం సుస్మితం చ ముఖం స్త్రియః
త్వఙ్మాంసరుధిరస్నాయు మేదోమజ్జాస్థిసంహతౌ
విణ్మూత్రపూయే రమతాం కృమీణాం కియదన్తరమ్
అథాపి నోపసజ్జేత స్త్రీషు స్త్రైణేషు చార్థవిత్
విషయేన్ద్రియసంయోగాన్మనః క్షుభ్యతి నాన్యథా
అదృష్టాదశ్రుతాద్భావాన్న భావ ఉపజాయతే
అసమ్ప్రయుఞ్జతః ప్రాణాన్శామ్యతి స్తిమితం మనః
తస్మాత్సఙ్గో న కర్తవ్యః స్త్రీషు స్త్రైణేషు చేన్ద్రియైః
విదుషాం చాప్యవిస్రబ్ధః షడ్వర్గః కిము మాదృశామ్
శ్రీభగవానువాచ
ఏవం ప్రగాయన్నృపదేవదేవః స ఉర్వశీలోకమథో విహాయ
ఆత్మానమాత్మన్యవగమ్య మాం వై ఉపారమజ్జ్ఞానవిధూతమోహః
తతో దుఃసఙ్గముత్సృజ్య సత్సు సజ్జేత బుద్ధిమాన్
సన్త ఏవాస్య ఛిన్దన్తి మనోవ్యాసఙ్గముక్తిభిః
సన్తోऽనపేక్షా మచ్చిత్తాః ప్రశాన్తాః సమదర్శినః
నిర్మమా నిరహఙ్కారా నిర్ద్వన్ద్వా నిష్పరిగ్రహాః
తేషు నిత్యం మహాభాగ మహాభాగేషు మత్కథాః
సమ్భవన్తి హి తా నౄణాం జుషతాం ప్రపునన్త్యఘమ్
తా యే శృణ్వన్తి గాయన్తి హ్యనుమోదన్తి చాదృతాః
మత్పరాః శ్రద్దధానాశ్చ భక్తిం విన్దన్తి తే మయి
భక్తిం లబ్ధవతః సాధోః కిమన్యదవశిష్యతే
మయ్యనన్తగుణే బ్రహ్మణ్యానన్దానుభవాత్మని
యథోపశ్రయమాణస్య భగవన్తం విభావసుమ్
శీతం భయం తమోऽప్యేతి సాధూన్సంసేవతస్తథా
నిమజ్జ్యోన్మజ్జతాం ఘోరే భవాబ్ధౌ పరమాయణమ్
సన్తో బ్రహ్మవిదః శాన్తా నౌర్దృఢేవాప్సు మజ్జతామ్
అన్నం హి ప్రాణినాం ప్రాణ ఆర్తానాం శరణం త్వహమ్
ధర్మో విత్తం నృణాం ప్రేత్య సన్తోऽర్వాగ్బిభ్యతోऽరణమ్
సన్తో దిశన్తి చక్షూంసి బహిరర్కః సముత్థితః
దేవతా బాన్ధవాః సన్తః సన్త ఆత్మాహమేవ చ
వైతసేనస్తతోऽప్యేవముర్వశ్యా లోకనిష్పృహః
ముక్తసఙ్గో మహీమేతామాత్మారామశ్చచార హ
| ←ముందరి అధ్యాయము | శ్రీమద్భాగవత పురాణము | తరువాతి అధ్యాయము→ |