శ్రీమద్భాగవత పురాణము - స్కంధము 10 - అధ్యాయము 64
| ←ముందరి అధ్యాయము | శ్రీమద్భాగవత పురాణము (శ్రీమద్భాగవత పురాణము - స్కంధము 10 - అధ్యాయము 64) | తరువాతి అధ్యాయము→ |
శ్రీబాదరాయణిరువాచ
ఏకదోపవనం రాజన్జగ్ముర్యదుకుమారకాః
విహర్తుం సామ్బప్రద్యుమ్న చారుభానుగదాదయః
క్రీడిత్వా సుచిరం తత్ర విచిన్వన్తః పిపాసితాః
జలం నిరుదకే కూపే దదృశుః సత్త్వమద్భుతమ్
కృకలాసం గిరినిభం వీక్ష్య విస్మితమానసాః
తస్య చోద్ధరణే యత్నం చక్రుస్తే కృపయాన్వితాః
చర్మజైస్తాన్తవైః పాశైర్బద్ధ్వా పతితమర్భకాః
నాశక్నురన్సముద్ధర్తుం కృష్ణాయాచఖ్యురుత్సుకాః
తత్రాగత్యారవిన్దాక్షో భగవాన్విశ్వభావనః
వీక్ష్యోజ్జహార వామేన తం కరేణ స లీలయా
స ఉత్తమఃశ్లోకకరాభిమృష్టో విహాయ సద్యః కృకలాసరూపమ్
సన్తప్తచామీకరచారువర్ణః స్వర్గ్యద్భుతాలఙ్కరణామ్బరస్రక్
పప్రచ్ఛ విద్వానపి తన్నిదానం జనేషు విఖ్యాపయితుం ముకున్దః
కస్త్వం మహాభాగ వరేణ్యరూపో దేవోత్తమం త్వాం గణయామి నూనమ్
దశామిమాం వా కతమేన కర్మణా సమ్ప్రాపితోऽస్యతదర్హః సుభద్ర
ఆత్మానమాఖ్యాహి వివిత్సతాం నో యన్మన్యసే నః క్షమమత్ర వక్తుమ్
శ్రీశుక ఉవాచ
ఇతి స్మ రాజా సమ్పృష్టః కృష్ణేనానన్తమూర్తినా
మాధవం ప్రణిపత్యాహ కిరీటేనార్కవర్చసా
నృగ ఉవాచ
నృగో నామ నరేన్ద్రోऽహమిక్ష్వాకుతనయః ప్రభో
దానిష్వాఖ్యాయమానేషు యది తే కర్ణమస్పృశమ్
కిం ను తేऽవిదితం నాథ సర్వభూతాత్మసాక్షిణః
కాలేనావ్యాహతదృశో వక్ష్యేऽథాపి తవాజ్ఞయా
యావత్యః సికతా భూమేర్యావత్యో దివి తారకాః
యావత్యో వర్షధారాశ్చ తావతీరదదం స్మ గాః
పయస్వినీస్తరుణీః శీలరూప గుణోపపన్నాః కపిలా హేమసృఙ్గీః
న్యాయార్జితా రూప్యఖురాః సవత్సా దుకూలమాలాభరణా దదావహమ్
స్వలఙ్కృతేభ్యో గుణశీలవద్భ్యః సీదత్కుటుమ్బేభ్య ఋతవ్రతేభ్యః
తపఃశ్రుతబ్రహ్మవదాన్యసద్భ్యః ప్రాదాం యువభ్యో ద్విజపుఙ్గవేభ్యః
గోభూహిరణ్యాయతనాశ్వహస్తినః కన్యాః సదాసీస్తిలరూప్యశయ్యాః
వాసాంసి రత్నాని పరిచ్ఛదాన్రథానిష్టం చ యజ్ఞైశ్చరితం చ పూర్తమ్
కస్యచిద్ద్విజముఖ్యస్య భ్రష్టా గౌర్మమ గోధనే
సమ్పృక్తావిదుషా సా చ మయా దత్తా ద్విజాతయే
తాం నీయమానాం తత్స్వామీ దృష్ట్రోవాచ మమేతి తమ్
మమేతి పరిగ్రాహ్యాహ నృగో మే దత్తవానితి
విప్రౌ వివదమానౌ మామూచతుః స్వార్థసాధకౌ
భవాన్దాతాపహర్తేతి తచ్ఛ్రుత్వా మేऽభవద్భ్రమః
అనునీతావుభౌ విప్రౌ ధర్మకృచ్ఛ్రగతేన వై
గవాం లక్షం ప్రకృష్టానాం దాస్యామ్యేషా ప్రదీయతామ్
భవన్తావనుగృహ్ణీతాం కిఙ్కరస్యావిజానతః
సముద్ధరతం మాం కృచ్ఛ్రాత్పతన్తం నిరయేऽశుచౌ
నాహం ప్రతీచ్ఛే వై రాజన్నిత్యుక్త్వా స్వామ్యపాక్రమత్
నాన్యద్గవామప్యయుతమిచ్ఛామీత్యపరో యయౌ
ఏతస్మిన్నన్తరే యామైర్దూతైర్నీతో యమక్షయమ్
యమేన పృష్టస్తత్రాహం దేవదేవ జగత్పతే
పూర్వం త్వమశుభం భుఙ్క్ష ఉతాహో నృపతే శుభమ్
నాన్తం దానస్య ధర్మస్య పశ్యే లోకస్య భాస్వతః
పూర్వం దేవాశుభం భుఞ్జ ఇతి ప్రాహ పతేతి సః
తావదద్రాక్షమాత్మానం కృకలాసం పతన్ప్రభో
బ్రహ్మణ్యస్య వదాన్యస్య తవ దాసస్య కేశవ
స్మృతిర్నాద్యాపి విధ్వస్తా భవత్సన్దర్శనార్థినః
స త్వం కథం మమ విభోऽక్షిపథః పరాత్మా
యోగేశ్వరః శ్రుతిదృశామలహృద్విభావ్యః
సాక్షాదధోక్షజ ఉరువ్యసనాన్ధబుద్ధేః
స్యాన్మేऽనుదృశ్య ఇహ యస్య భవాపవర్గః
దేవదేవ జగన్నాథ గోవిన్ద పురుషోత్తమ
నారాయణ హృషీకేశ పుణ్యశ్లోకాచ్యుతావ్యయ
అనుజానీహి మాం కృష్ణ యాన్తం దేవగతిం ప్రభో
యత్ర క్వాపి సతశ్చేతో భూయాన్మే త్వత్పదాస్పదమ్
నమస్తే సర్వభావాయ బ్రహ్మణేऽనన్తశక్తయే
కృష్ణాయ వాసుదేవాయ యోగానాం పతయే నమః
ఇత్యుక్త్వా తం పరిక్రమ్య పాదౌ స్పృష్ట్వా స్వమౌలినా
అనుజ్ఞాతో విమానాగ్ర్యమారుహత్పశ్యతాం నృణామ్
కృష్ణః పరిజనం ప్రాహ భగవాన్దేవకీసుతః
బ్రహ్మణ్యదేవో ధర్మాత్మా రాజన్యాననుశిక్షయన్
దుర్జరం బత బ్రహ్మస్వం భుక్తమగ్నేర్మనాగపి
తేజీయసోऽపి కిముత రాజ్ఞాం ఈశ్వరమానినామ్
నాహం హాలాహలం మన్యే విషం యస్య ప్రతిక్రియా
బ్రహ్మస్వం హి విషం ప్రోక్తం నాస్య ప్రతివిధిర్భువి
హినస్తి విషమత్తారం వహ్నిరద్భిః ప్రశామ్యతి
కులం సమూలం దహతి బ్రహ్మస్వారణిపావకః
బ్రహ్మస్వం దురనుజ్ఞాతం భుక్తం హన్తి త్రిపూరుషమ్
ప్రసహ్య తు బలాద్భుక్తం దశ పూర్వాన్దశాపరాన్
రాజానో రాజలక్ష్మ్యాన్ధా నాత్మపాతం విచక్షతే
నిరయం యేऽభిమన్యన్తే బ్రహ్మస్వం సాధు బాలిశాః
గృహ్ణన్తి యావతః పాంశూన్క్రన్దతామశ్రుబిన్దవః
విప్రాణాం హృతవృత్తీనామ్వదాన్యానాం కుటుమ్బినామ్
రాజానో రాజకుల్యాశ్చ తావతోऽబ్దాన్నిరఙ్కుశాః
కుమ్భీపాకేషు పచ్యన్తే బ్రహ్మదాయాపహారిణః
స్వదత్తాం పరదత్తాం వా బ్రహ్మవృత్తిం హరేచ్చ యః
షష్టివర్షసహస్రాణి విష్ఠాయాం జాయతే కృమిః
న మే బ్రహ్మధనం భూయాద్యద్గృధ్వాల్పాయుషో నరాః
పరాజితాశ్చ్యుతా రాజ్యాద్భవన్త్యుద్వేజినోऽహయః
విప్రం కృతాగసమపి నైవ ద్రుహ్యత మామకాః
ఘ్నన్తం బహు శపన్తం వా నమస్కురుత నిత్యశః
యథాహం ప్రణమే విప్రాననుకాలం సమాహితః
తథా నమత యూయం చ యోऽన్యథా మే స దణ్డభాక్
బ్రాహ్మణార్థో హ్యపహృతో హర్తారం పాతయత్యధః
అజానన్తమపి హ్యేనం నృగం బ్రాహ్మణగౌరివ
ఏవం విశ్రావ్య భగవాన్ముకున్దో ద్వారకౌకసః
పావనః సర్వలోకానాం వివేశ నిజమన్దిరమ్
| ←ముందరి అధ్యాయము | శ్రీమద్భాగవత పురాణము | తరువాతి అధ్యాయము→ |