శ్రీమద్భాగవత పురాణము - స్కంధము 10 - అధ్యాయము 63
| ←ముందరి అధ్యాయము | శ్రీమద్భాగవత పురాణము (శ్రీమద్భాగవత పురాణము - స్కంధము 10 - అధ్యాయము 63) | తరువాతి అధ్యాయము→ |
శృశుక ఉవాచ
అపశ్యతాం చానిరుద్ధం తద్బన్ధూనాం చ భారత
చత్వారో వార్షికా మాసా వ్యతీయురనుశోచతామ్
నారదాత్తదుపాకర్ణ్య వార్తాం బద్ధస్య కర్మ చ
ప్రయయుః శోణితపురం వృష్ణయః కృష్ణదైవతాః
ప్రద్యుమ్నో యుయుధానశ్చ గదః సామ్బోऽథ సారణః
నన్దోపనన్దభద్రాద్యా రామకృష్ణానువర్తినః
అక్షౌహిణీభిర్ద్వాదశభిః సమేతాః సర్వతో దిశమ్
రురుధుర్బాణనగరం సమన్తాత్సాత్వతర్షభాః
భజ్యమానపురోద్యాన ప్రాకారాట్టాలగోపురమ్
ప్రేక్షమాణో రుషావిష్టస్తుల్యసైన్యోऽభినిర్యయౌ
బాణార్థే భగవాన్రుద్రః ససుతః ప్రమథైర్వృతః
ఆరుహ్య నన్దివృషభం యుయుధే రామకృష్ణయోః
ఆసీత్సుతుములం యుద్ధమద్భుతం రోమహర్షణమ్
కృష్ణశఙ్కరయో రాజన్ప్రద్యుమ్నగుహయోరపి
కుమ్భాణ్డకూపకర్ణాభ్యాం బలేన సహ సంయుగః
సామ్బస్య బాణపుత్రేణ బాణేన సహ సాత్యకేః
బ్రహ్మాదయః సురాధీశా మునయః సిద్ధచారణాః
గన్ధర్వాప్సరసో యక్షా విమానైర్ద్రష్టుమాగమన్
శఙ్కరానుచరాన్శౌరిర్భూతప్రమథగుహ్యకాన్
డాకినీర్యాతుధానాంశ్చ వేతాలాన్సవినాయకాన్
ప్రేతమాతృపిశాచాంశ్చ కుష్మాణ్డాన్బ్రహ్మరాక్షసాన్
ద్రావయామాస తీక్ష్ణాగ్రైః శరైః శార్ఙ్గధనుశ్చ్యుతైః
పృథగ్విధాని ప్రాయుఙ్క్త పిణాక్యస్త్రాణి శార్ఙ్గిణే
ప్రత్యస్త్రైః శమయామాస శార్ఙ్గపాణిరవిస్మితః
బ్రహ్మాస్త్రస్య చ బ్రహ్మాస్త్రం వాయవ్యస్య చ పార్వతమ్
ఆగ్నేయస్య చ పార్జన్యం నైజం పాశుపతస్య చ
మోహయిత్వా తు గిరిశం జృమ్భణాస్త్రేణ జృమ్భితమ్
బాణస్య పృతనాం శౌరిర్జఘానాసిగదేషుభిః
స్కన్దః ప్రద్యుమ్నబాణౌఘైరర్ద్యమానః సమన్తతః
అసృగ్విముఞ్చన్గాత్రేభ్యః శిఖినాపక్రమద్రణాత్
కుమ్భాణ్డకూపకర్ణశ్చ పేతతుర్ముషలార్దితౌ
దుద్రువుస్తదనీకని హతనాథాని సర్వతః
విశీర్యమాణమ్స్వబలం దృష్ట్వా బాణోऽత్యమర్షితః
కృష్ణమభ్యద్రవత్సఙ్ఖ్యే రథీ హిత్వైవ సాత్యకిమ్
ధనూంష్యాకృష్య యుగపద్బాణః పఞ్చశతాని వై
ఏకైకస్మిన్శరౌ ద్వౌ ద్వౌ సన్దధే రణదుర్మదః
తాని చిచ్ఛేద భగవాన్ధనూంసి యుగపద్ధరిః
సారథిం రథమశ్వాంశ్చ హత్వా శఙ్ఖమపూరయత్
తన్మాతా కోటరా నామ నగ్నా మక్తశిరోరుహా
పురోऽవతస్థే కృష్ణస్య పుత్రప్రాణరిరక్షయా
తతస్తిర్యఙ్ముఖో నగ్నామనిరీక్షన్గదాగ్రజః
బాణశ్చ తావద్విరథశ్ఛిన్నధన్వావిశత్పురమ్
విద్రావితే భూతగణే జ్వరస్తు త్రీశిరాస్త్రీపాత్
అభ్యధావత దాశార్హం దహన్నివ దిశో దశ
అథ నారాయణః దేవః తం దృష్ట్వా వ్యసృజజ్జ్వరమ్
మాహేశ్వరో వైష్ణవశ్చ యుయుధాతే జ్వరావుభౌ
మాహేశ్వరః సమాక్రన్దన్వైష్ణవేన బలార్దితః
అలబ్ధ్వాభయమన్యత్ర భీతో మాహేశ్వరో జ్వరః
శరణార్థీ హృషీకేశం తుష్టావ ప్రయతాఞ్జలిః
జ్వర ఉవాచ
నమామి త్వానన్తశక్తిం పరేశమ్సర్వాత్మానం కేవలం జ్ఞప్తిమాత్రమ్
విశ్వోత్పత్తిస్థానసంరోధహేతుం యత్తద్బ్రహ్మ బ్రహ్మలిఙ్గమ్ప్రశాన్తమ్
కాలో దైవం కర్మ జీవః స్వభావో ద్రవ్యం క్షేత్రం ప్రాణ ఆత్మా వికారః
తత్సఙ్ఘాతో బీజరోహప్రవాహస్త్వన్మాయైషా తన్నిషేధం ప్రపద్యే
నానాభావైర్లీలయైవోపపన్నైర్దేవాన్సాధూన్లోకసేతూన్బిభర్షి
హంస్యున్మార్గాన్హింసయా వర్తమానాన్జన్మైతత్తే భారహారాయ భూమేః
తప్తోऽహమ్తే తేజసా దుఃసహేన శాన్తోగ్రేణాత్యుల్బణేన జ్వరేణ
తావత్తాపో దేహినాం తేऽన్ఘ్రిమూలం నో సేవేరన్యావదాశానుబద్ధాః
శ్రీభగవానువాచ
త్రిశిరస్తే ప్రసన్నోऽస్మి వ్యేతు తే మజ్జ్వరాద్భయమ్
యో నౌ స్మరతి సంవాదం తస్య త్వన్న భవేద్భయమ్
ఇత్యుక్తోऽచ్యుతమానమ్య గతో మాహేశ్వరో జ్వరః
బాణస్తు రథమారూఢః ప్రాగాద్యోత్స్యన్జనార్దనమ్
తతో బాహుసహస్రేణ నానాయుధధరోऽసురః
ముమోచ పరమక్రుద్ధో బాణాంశ్చక్రాయుధే నృప
తస్యాస్యతోऽస్త్రాణ్యసకృచ్చక్రేణ క్షురనేమినా
చిచ్ఛేద భగవాన్బాహూన్శాఖా ఇవ వనస్పతేః
బాహుషు ఛిద్యమానేషు బాణస్య భగవాన్భవః
భక్తానకమ్ప్యుపవ్రజ్య చక్రాయుధమభాషత
శ్రీరుద్ర ఉవాచ
త్వం హి బ్రహ్మ పరం జ్యోతిర్గూఢం బ్రహ్మణి వాఙ్మయే
యం పశ్యన్త్యమలాత్మాన ఆకాశమివ కేవలమ్
నాభిర్నభోऽగ్నిర్ముఖమమ్బు రేతో
ద్యౌః శీర్షమాశాః శ్రుతిరఙ్ఘ్రిరుర్వీ
చన్ద్రో మనో యస్య దృగర్క ఆత్మా
అహం సముద్రో జఠరం భుజేన్ద్రః
రోమాణి యస్యౌషధయోऽమ్బువాహాః
కేశా విరిఞ్చో ధిషణా విసర్గః
ప్రజాపతిర్హృదయం యస్య ధర్మః
స వై భవాన్పురుషో లోకకల్పః
తవావతారోऽయమకుణ్ఠధామన్ధర్మస్య గుప్త్యై జగతో హితాయ
వయం చ సర్వే భవతానుభావితా విభావయామో భువనాని సప్త
త్వమేక ఆద్యః పురుషోऽద్వితీయస్తుర్యః స్వదృగ్ధేతురహేతురీశః
ప్రతీయసేऽథాపి యథావికారం స్వమాయయా సర్వగుణప్రసిద్ధ్యై
యథైవ సూర్యః పిహితశ్ఛాయయా స్వయా
ఛాయాం చ రూపాణి చ సఞ్చకాస్తి
ఏవం గుణేనాపిహితో గుణాంస్త్వమ్
ఆత్మప్రదీపో గుణినశ్చ భూమన్
యన్మాయామోహితధియః పుత్రదారగృహాదిషు
ఉన్మజ్జన్తి నిమజ్జన్తి ప్రసక్తా వృజినార్ణవే
దేవదత్తమిమం లబ్ధ్వా నృలోకమజితేన్ద్రియః
యో నాద్రియేత త్వత్పాదౌ స శోచ్యో హ్యాత్మవఞ్చకః
యస్త్వాం విసృజతే మర్త్య ఆత్మానం ప్రియమీశ్వరమ్
విపర్యయేన్ద్రియార్థార్థం విషమత్త్యమృతం త్యజన్
అహం బ్రహ్మాథ విబుధా మునయశ్చామలాశయాః
సర్వాత్మనా ప్రపన్నాస్త్వామాత్మానం ప్రేష్ఠమీశ్వరమ్
తం త్వా జగత్స్థిత్యుదయాన్తహేతుం
సమం ప్రసాన్తం సుహృదాత్మదైవమ్
అనన్యమేకం జగదాత్మకేతం
భవాపవర్గాయ భజామ దేవమ్
అయం మమేష్టో దయితోऽనువర్తీ మయాభయం దత్తమముష్య దేవ
సమ్పాద్యతాం తద్భవతః ప్రసాదో యథా హి తే దైత్యపతౌ ప్రసాదః
శ్రీభగవానువాచ
యదాత్థ భగవంస్త్వం నః కరవామ ప్రియం తవ
భవతో యద్వ్యవసితం తన్మే సాధ్వనుమోదితమ్
అవధ్యోऽయం మమాప్యేష వైరోచనిసుతోऽసురః
ప్రహ్రాదాయ వరో దత్తో న వధ్యో మే తవాన్వయః
దర్పోపశమనాయాస్య ప్రవృక్ణా బాహవో మయా
సూదితం చ బలం భూరి యచ్చ భారాయితం భువః
చత్వారోऽస్య భుజాః శిష్టా భవిష్యత్యజరామరః
పార్షదముఖ్యో భవతో న కుతశ్చిద్భయోऽసురః
ఇతి లబ్ధ్వాభయం కృష్ణం ప్రణమ్య శిరసాసురః
ప్రాద్యుమ్నిం రథమారోప్య సవధ్వో సముపానయత్
అక్షౌహిణ్యా పరివృతం సువాసఃసమలఙ్కృతమ్
సపత్నీకం పురస్కృత్య యయౌ రుద్రానుమోదితః
స్వరాజధానీం సమలఙ్కృతాం ధ్వజైః
సతోరణైరుక్షితమార్గచత్వరామ్
వివేశ శఙ్ఖానకదున్దుభిస్వనైర్
అభ్యుద్యతః పౌరసుహృద్ద్విజాతిభిః
య ఏవం కృష్ణవిజయం శఙ్కరేణ చ సంయుగమ్
సంస్మరేత్ప్రాతరుత్థాయ న తస్య స్యాత్పరాజయః
| ←ముందరి అధ్యాయము | శ్రీమద్భాగవత పురాణము | తరువాతి అధ్యాయము→ |