శుక్ల యజుర్వేదము - అధ్యాయము 36
| ←ముందరి అధ్యాయము | శుక్ల యజుర్వేదము (శుక్ల యజుర్వేదము - అధ్యాయము 36) | తరువాతి అధ్యాయము→ |
ఋచం వాచం ప్ర పద్యే మనో యజుః ప్ర పద్యే సామ ప్రాణం ప్ర పద్యే
చక్షుః శ్రోత్రం ప్ర పద్యే |
వాగోజః సహౌజో మయి ప్రాణాపానౌ ||
యన్మే ఛిద్రం చక్షుషో హృదయస్య మనసో వాతితృణం బృహస్పతిర్మే
తద్దధాతు |
శం నో భవతు భువనస్య యస్పతిః ||
భూర్భువః స్వః |
తత్సవితుర్వరేణ్యం భర్గో దేవస్య ధీమహి |
ధియో యో నః ప్రచోదయత్ ||
కయా నశ్చిత్ర ఆ భువదూతీ సదావృధః సఖా |
కయా శచిష్ఠయా వృతా ||
కస్త్వా సత్యో మదానాం మఁహిష్ఠో మత్సదన్ధసః |
దృఢా చిదారుజే వసు ||
అభీ షు ణః సఖీనామవితా జరితౄణామ్ |
శతం భవాస్యూతయే ||
కయా త్వమ్న ఊత్యాభి ప్ర మన్దసే వృషన్ |
కయా స్తోతృభ్య ఆ భర ||
ఇన్ద్రో విశ్వస్య రాజతి |
శం నో అస్తు ద్విపదే శం చతుష్పదే ||
శం నో మిత్రఁ శం వరుణః శం నో భవత్వర్యమా |
శం న ఇన్ద్రో బృహస్పతిః శం నో విష్ణురురుక్రమః ||
శం నో వాతః పవతాఁ శం నస్తపతు సూర్యః |
శం నః కనిక్రదద్దేవః పర్జన్యో అభి వర్షతు ||
అహాని శం భవన్తు నః శఁ రాత్రీః ప్రతి ధీయతామ్ |
శం న ఇన్ద్రాగ్నీ భవతామవోభిః శం న ఇన్ద్రావరుణా రాతహవ్యా |
శం న ఇన్ద్రాపూషణా వాజసాతౌ శమిన్ద్రాసోమా సువితాయ శం యోః ||
శం నో దేవీరభిష్టయ ఆపో భవన్తు పీతయే |
శం యోరభి స్రవన్తు నః ||
స్యోనా పృథివి నో భవానృక్షరా నివేశనీ |
యచ్ఛా నః శర్మ సప్రథాః ||
ఆపో హి ష్ఠా మయోభువస్తా న ఊర్జే దధాతన |
మహే రణాయ చక్షసే ||
యో వః శివతమో రసస్తస్య భాజయతేహ నః |
ఉశతీరివ మాతరః ||
తస్మా అరం గమామ వో యస్య క్షయాయ జిన్వథ |
ఆపో జనయథా చ నః ||
ద్యౌః శాన్తిరన్తరిక్షఁ శాన్తిః పృథివీ శాన్తిరాపః
శాన్తిరోషధయః శాన్తిః |
వనస్పతయః శాన్తిర్విశ్వే దేవాః శాన్తిర్బ్రహ్మ శాన్తిః సర్వఁ
శాన్తిః శాన్తిరేవ శాన్తిః సా మా శాన్తిరేధి ||
దృతే దృఁహ మా మిత్రస్య మా చక్షుషా సర్వాణి భూతాని
సమీక్షన్తామ్ |
మిత్రస్యాహం చక్షుషా సర్వాణి భూతాని సమీక్షే |
మిత్రస్య చక్షుషా సమీక్షామహే ||
దృతే దృఁహ మా |
జ్యోక్తే సందృశి జీవ్యాసం జ్యోక్తే సందృశి జీవ్యాసమ్ ||
నమస్తే హరసే శోచిషే నమస్తే అస్త్వర్చిషే |
అన్యాఁస్తే అస్మత్తపన్తు హేతయః పావకో అస్మభ్యఁ శివో భవ ||
నమస్తే అస్తు విద్యుతే నమస్తే స్తనయిత్నవే |
నమస్తే భగవన్నస్తు యతః స్వః సమీహసే ||
యతో-యతః సమీహసే తతో నో అభయం కురు |
శం నః కురు ప్రజాభ్యో భయం నః పశుభ్యః ||
సుమిత్రియా న ఆప ఓషధయః సన్తు దుర్మిత్రియాస్తస్మై సన్తు యో
స్మాన్ద్వేష్టి యం చ వయం ద్విష్మః ||
తచ్చక్షుర్దేవహితం పురస్తాచ్ఛుక్రముచ్చరత్ |
పశ్యేమ శరదః శతం జీవేమ శరదః శతఁ శృణుయామ శరదః శతం ప్ర
బ్రవామ శరదః శతమదీనాః స్యామ శరదః శతం భూయశ్చ శరదః శతాత్ ||
| ←ముందరి అధ్యాయము | శుక్ల యజుర్వేదము | తరువాతి అధ్యాయము→ |