శుక్ల యజుర్వేదము - అధ్యాయము 34

వికీసోర్స్ నుండి
శుక్ల యజుర్వేదము (శుక్ల యజుర్వేదము - అధ్యాయము 34)



  
యజ్జాగ్రతో దూరముదైతి దైవం తదు సుప్తస్య తథైవైతి |
దూరంగమం జ్యోతిషాం జ్యోతిరేకం తన్మే మనః శివసంకల్పమస్తు ||

  
యేన కర్మాణ్యపసో మనీషిణో యజ్ఞే కృణ్వన్తి విదథేషు ధీరాః |
యదపూర్వం యక్షమన్తః ప్రజానాం తన్మే మనః శివసంకల్పమస్తు ||

  
యత్ప్రజ్ఞానముత చేతో ధృతిశ్చ యజ్జ్యోతిరన్తరమృతం ప్రజాసు |
యస్మాన్న ఋతే కిం చన కర్మ క్రియతే తన్మే మనః శివసంకల్పమస్తు ||

  
యేనేదం భూతం భువనం భవిష్యత్పరిగృహీతమమృతేన సర్వమ్ |
యేన యజ్ఞస్తాయతే సప్తహోతా తన్మే మనః శివసంకల్పమస్తు ||

  
యస్మిన్నృచః సామ యజూఁషి యస్మిన్ప్రతిష్ఠితా రథనాభావివారాః |
యస్మిఁశ్చిత్తఁ సర్వమోతం ప్రజానం తన్మే మనః శివసంకల్పమస్తు ||

  
సుషారథిరశ్వానివ యన్మనుష్యాన్నేనీయతే భీశుభిర్వాజిన ఇవ |
హృత్ప్రతిష్ఠం యదజిరం జవిష్ఠం తన్మే మనః శివసంకల్పమస్తు ||

  
పితుం ను స్తోషం మహో ధర్మాణం తవిషీమ్ |
యస్య త్రితో వ్యోజసా వృత్రం విపర్వమర్దయత్ ||

  
అన్విదనుమతే త్వం మన్యాసై శం చ నస్కృధి |
క్రత్వే దక్షాయ నో హిను ప్ర ణ ఆయూఁషి తారిషః ||

  
అను నో ద్యానుమతిర్యజ్ఞం దేవేషు మన్యతామ్ |
అగ్నిశ్చ హవ్యవాహనో భవతం దాశుషే మయః ||

  
సినీవాలి పృథుష్టుకే యా దేవానామసి స్వసా |
జుషస్వ హవ్యమాహుతం ప్రజాం దేవి దిదిడ్ఢి నః ||

  
పఞ్చ నద్యః సరస్వతీమపి యన్తి సస్రోతసః |
సరస్వతీ తు పఞ్చధా సో దేశే భవత్సరిత్ ||

  
త్వమగ్నే ప్రథమో అఙ్గిరా ఋషిర్దేవో దేవానామభవః శివః సఖా |
తవ వ్రతే కవయో విద్మనాపసో జాయన్త మరుతో భ్రాజదృష్టయః ||

  
త్వం నో అగ్నే తవే దేవ పాయుభిర్మఘోనో రక్ష తన్వశ్చ వన్ద్య |
త్రాతా తోకస్య తనయే గవామస్యనిమేషఁ రక్షణస్తవ వ్రతే ||

  
ఉత్తానాయామవ భరా చికిత్వాన్త్సద్యః ప్రవీతా వృషణం జజాన |
అరుషస్తూపో రుశదస్య పాజ ఇడాయాస్పుత్రో వయునే జనిష్ట ||

  
ఇడాయాస్త్వా పదే వయం నాభా పృథివ్యా అధి |
జాతవేదో ని ధీమహ్యగ్నే హవ్యాయ వోఢవే ||

  
ప్ర మన్మహే శవసానాయ శూషమాఙ్గూషం గిర్వణసే అఙ్గిరస్వత్ |
సువృక్తిభి స్తువత ఋగ్మియాయార్చామార్కం నరే విశ్రుతాయ ||

  
ప్ర వో మహే మహి నమో భరధ్వమాఙ్గూష్యఁ శవసానాయ సామ |
యేనా నః పూర్వే పితరః పదజ్ఞా అర్చన్తో అఙ్గిరసో గా అవిన్దన్ ||

  
ఇచ్ఛన్తి త్వా సోమ్యాసః సఖాయః సున్వన్తి సోమం దధతి ప్రయాఁసి |
తితిక్షన్తే అభిశస్తిం జనానామిన్ద్ర త్వదా కశ్చన హి ప్రకేతః ||

  
న తే దూరే పరమా చిద్రజాఁస్యస్యా తు ప్ర యాహి హరివో హరిభ్యామ్ |
స్థిరాయ వృష్ణే సవనా కృతేమా యుక్తా గ్రావాణః సమిధానే అగ్నౌ ||

  
అషాఢం యుత్సు పృతనాసు పప్రిఁ స్వర్షామప్సాం వృజనస్య గోపామ్ |
భరేషుజాఁ సుక్షితిఁ సుశ్రవసం జయన్తం త్వామను మదేమ సోమ ||

  
సోమో ధేనుఁ సోమో అర్వన్తమాశుఁ సోమో వీరం కర్మణ్యం దదాతి |
సాదన్యం విదథ్యఁ సభేయం పితృశ్రవణం యో దదాశదస్మై ||

  
త్వమిమా ఓషధీః సోమ విశ్వాస్త్వమపో అజనయస్త్వం గాః |
త్వమా తతన్థోర్వన్తరిక్షం త్వం జ్యోతిషా వి తమో వవర్థ ||

  
దేవేన నో మనసా దేవ సోమ రాయో భాగఁ సహసావన్నభి యుధ్య |
మా త్వా తనదీశిషే వీర్యస్యోభయేభ్యః ప్ర చికిత్సా గవిష్టౌ ||

  
అష్టౌ వ్యఖ్యత్కకుభః పృథివ్యాస్త్రీ ధన్వ యోజనా సప్త సిన్ధూన్ |
హిరణ్యాక్షః సవితా దేవ ఆగాద్దధద్రత్నా దాశుషే వార్యాణి ||

  
హిరణ్యపాణిః సవితా విచర్షణిరుభే ద్యావాపృథివీ అన్తరీయతే |
అపామీవాం బాధతే వేతి సూర్యమభి కృష్ణేన రజసా ద్యామృణోతి ||

  
హిరణ్యహస్తో అసురః సునీథః సుమృడీకః స్వవా యాత్వర్వాఙ్ |
అపసేధన్రక్షసో యాతుధానానస్థాద్దేవః ప్రతిదోషం గృణానః ||

  
యే తే పన్థాః సవితః పూర్వ్యాసో రేణవః సుకృతా అన్తరిక్షే |
తేభిర్నో అద్య పథిభిః సుగేభీ రక్షా చ నో అధి చ బ్రూహి దేవ ||

  
ఉభా పిబతమశ్వినోభా నః శర్మ యచ్ఛతమ్ |
అవిద్రియాభిరూతిభిః ||

  
అప్నస్వతీమశ్వినా వాచమస్మే కృతం నో దస్రా వృషణా మనీషామ్ |
అద్యూత్యే వసే ని హ్వయే వాం వృధే చ నో భవతం వాజసాతౌ ||

  
ద్యుభిరక్తుభిః పరి పాతమస్మానరిష్టేభిరశ్వినా సౌభగేభిః |
తన్నో మిత్రో వరుణో మామహన్తామదితిః సిన్ధుః పృథివీ ఉత ద్యౌః ||

  
ఆ కృష్ణేన రజసా వర్తమానో నివేశయన్నమృతం మర్త్యం చ |
హిరణ్యయేన సవితా రథేనా దేవో యాతి భువనాని పశ్యన్ ||

  
ఆ రాత్రి పర్థివఁ రజః పితురప్రాయి ధమభిః |
దివః సదాఁసి బృహతీ వి తిష్ఠస ఆ త్వేషం వర్తతే తమః ||

  
ఉషస్తచ్చిత్రమా భరాస్మభ్యం వాజినీవతి |
యేన తోకం చ తనయం చ ధామహే ||

  
ప్రాతరగ్నిం ప్రాతరిన్ద్రఁ హవామహే ప్రాతర్మిత్రావరుణా
ప్రాతరశ్వినా |
ప్రాతర్భగం పూషణం బ్రహ్మణస్పతిం ప్రాతః సోమముత రుద్రఁ హువేమ ||

  
ప్రాతర్జితం భగముగ్రఁ హువేమ వయం పుత్రమదితేర్యో విధర్తా |
ఆధ్రశ్చిద్యం మన్యమానస్తురశ్చిద్రాజా చిద్యం భగం భక్షీత్యాహ ||

  
భగ ప్రణేతర్భగ సత్యరాధో భగేమాం ధియముదవా దదన్నః |
భగ ప్ర ణో జనయ గోభిరశ్వైర్భగ ప్ర నృభిర్నృవన్తః స్యామ ||

  
ఉతేదానీం భగవన్తః స్యామోత ప్రపిత్వ ఉత మధ్యే అహ్నామ్ |
ఉతోదితా మఘవన్సూర్యస్య వయం దేవానాఁ సుమతౌ స్యామ ||

  
భగ ఏవ భగవాఁ అస్తు దేవాస్తేన వయం భగవన్తః స్యామ |
తం త్వా భగ సర్వ ఇజ్జోహవీతి స నో భగ పురఏతా భవేహ ||

  
సమధ్వరాయోషసో నమన్త దధిక్రావేవ శుచయే పదాయ |
అర్వాచీనం వసువిదం భగం నో రథమివాశ్వా వాజిన ఆ వహన్తు ||

  
అశ్వావతీర్గోమతీర్న ఉషాసో వీరవతీః సదముచ్ఛన్తు భద్రాః |
ఘృతం దుహానా విశ్వతః ప్రపీతా యూయం పాత స్వస్తిభిః సదా నః ||

  
పూషన్తవ వ్రతే వయం న రిష్యేమ కదా చన |
స్తోతారస్త ఇహ స్మసి ||

  
పథస్-పథః పరిపతిం వచస్యా కామేన కృతో అభ్యానడర్కమ్ |
స నో రాసచ్ఛురుధశ్చన్ద్రాగ్రా ధియం-ధియఁ సీషధాతి ప్ర పూషా ||

  
త్రీణి పదా వి చక్రమే విష్ణుర్గోపా అదాభ్యః |
అతో ధర్మాణి ధారయన్ ||

  
తద్విప్రాసో విపన్యవో జాగృవాఁసః సమిన్ధతే |
విష్ణోర్యత్పరమం పదమ్ ||

  
ఘృతవతీ భువనానామభిశ్రియోర్వీ పృథ్వీ మధుదుఘే సుపేశసా |
ద్యావాపృథివీ వరుణస్య ధర్మణా విష్కభితే అజరే భూరిరేతసా ||

  
యే నః సపత్నా అప తే భవన్త్విన్ద్రాగ్నిభ్యామవ బాధామహే తాన్ |
వసవో రుద్రా ఆదిత్యా ఉపరిస్పృశం మోగ్రం చేత్తారమధిరాజమక్రన్ ||

  
ఆ నాసత్యా త్రిభిరేకాదశైరిహ దేవేభిర్యాతం మధుపేయమశ్వినా |
ప్రాయుస్తారిష్టం నీ రపాఁసి మృక్షతఁ సేధతం ద్వేషో భవతఁ సచాభువా ||

  
ఏష వ స్తోమో మరుత ఇయం గీర్మాన్దార్యస్య మాన్యస్య కారోః |
ఏషా యాసీష్ట తన్వే వయాం విద్యామేషం వృజనం జీరదానుమ్ ||

  
సహస్తోమాః సహచ్ఛన్దస ఆవృతః సహప్రమా ఋషయః సప్త దైవ్యాః |
పూర్వేషాం పన్థామనుదృశ్య ధీరా అన్వాలేభిరే రథ్యో న రశ్మీన్ ||

  
ఆయుష్యం వర్చస్యఁ రాయస్పోషఔద్భిదమ్ |
ఇదఁ హిరణ్యం వర్చస్వజ్జైత్రాయా విశతాదు మామ్ ||

  
న తద్రక్షాఁసి న పిశాచాస్తరన్తి దేవానామోజః ప్రథమజఁ హ్యేతత్ |
యో బిభర్తి దాక్షాయణఁ హిరణ్యఁ స దేవేషు కృణుతే దీర్ఘమాయుః స
మనుష్యేషు కృణుతే దీర్ఘమాయుః ||

  
యదాబధ్నన్దాక్షాయణా హిరణ్యఁ శతానీకాయ సుమనస్యమానాః |
తన్మ ఆ బధ్నామి శతశారదాయాయుష్మాన్జరదష్టిర్యథాసమ్ ||

  
ఉత నో హిర్బుధ్న్యః శృణోత్వజ ఏకపాత్పృథివీ సముద్రః |
విశ్వే దేవా ఋతావృధో హువానా స్తుతా మన్త్రాః కవిశస్తా అవన్తు ||

  
ఇమా గిర ఆదిత్యేభ్యో ఘృతస్నూః సనాద్రాజభ్యో జుహ్వా జుహోమి |
శృణోతు మిత్రో అర్యమా భగో నస్తువిజాతో వరుణో దక్షో అఁశః ||

  
సప్త ఋషయః ప్రతిహితాః శరీరే సప్త రక్షన్తి సదమప్రమాదమ్ |
సప్తాపః స్వపతో లోకమీయుస్తత్ర జాగృతో అస్వప్నజౌ సత్రద్సదౌ చ దేవౌ ||

  
ఉత్తిష్ఠ బ్రహ్మణస్పతే దేవయన్తస్త్వేమహే |
ఉప ప్ర యన్తు మరుతః సుదానవ ఇన్ద్ర ప్రాశూర్భవా సచా ||

  
ప్ర నూనం బ్రహ్మణస్పతిర్మన్త్రం వదత్యుక్థ్యమ్ |
యస్మిన్నిన్ద్రో వరుణో మిత్రో అర్యమా దేవా ఓకాఁసి చక్రిరే ||

  
బ్రహ్మణస్పతే త్వమస్య యన్తా సూక్తస్య బోధి తనయం చ జిన్వ |
విశ్వం తద్భద్రం యదవన్తి దేవా బృహద్వదేమ విదథే సువీరాః |
య ఇమా విశ్వా |
విశ్వకర్మా |
యో నః పితా |
అన్నపతే న్నస్య నో దేహి ||


శుక్ల యజుర్వేదము