శశికళ/మార్గము
< శశికళ
మార్గము
అడుగడుగునకీ ప్రపంచపు
చెడుగు హృదయము లెన్నొ చుట్టీ
కడుపునకు ఇసుమంత దొరకని
బడుగు బ్రతుకుల తూలునడకలొ
మధురమెక్కడ మంజులత లేవీ ! - దేవీ !
మార్గమెక్కడ స్వర్గ మెక్కడనే !
ప్రేమ లెరుగని నీమమెంచని
తామసులతో దట్టమీ మహి
కోటి రూకల గుణములెంచే
కూళలెందరొ ఏలునీ భువి
మధురమెక్కడ మంజులత లేవీ ! - దేవీ !
మార్గమెక్కడ స్వర్గ మెక్కడనే !
క్రోధవహ్నులు కుములు నాడులు
సాధకమ్ములు మృత్యు కీలలు
సాధు దేశము శాంతమేగతి
సత్యశీలాఽ హింసలేపధి
మధురమక్కడ మంజులత లవియే ! - దేవీ !
మార్గమదియే స్వర్గ మదియేనే !