బాలకాండము - సర్గము 27
శ్రీమద్వాల్మీకియరామాయణే బాలకాండే సప్తవింశః సర్గః |౧-౨౭|
| వాల్మీకి రామాయణము | ||||||||||
|---|---|---|---|---|---|---|---|---|---|---|
| ||||||||||
అథ తాం రజనీం ఉష్య విశ్వామిరో మహాయశాః |
ప్రహస్య రాఘవం వాక్యం ఉవాచ మధుర స్వరం |౧-౨౭-౧|
పరితుష్టో అస్మి భద్రం తే రాజపుత్ర మహాయశః |
ప్రీత్యా పరమయా యుక్తో దదామి అస్త్రాణి సర్వశః |౧-౨౭-౨|
దేవ అసుర గణాన్ వా అపి స గంధర్వ ఉరగాన్ భువి |
యైః అమిత్రాన్ ప్రసహ్య ఆజౌ వశీకృత్య జయిష్యసి |౧-౨౭-౩|
తాని దివ్యాని భద్రం తే దదామి అస్త్రాణి సర్వశః |
దణ్డ చక్రం మహత్ దివ్యం తవ దాస్యామి రాఘవ |౧-౨౭-౪|
ధర్మ చక్రం తతో వీర కాల చక్రం తథైవ చ |
విష్ణు చక్రం తథా అతి ఉగ్రం ఐంద్రం చక్రం తథైవ చ |౧-౨౭-౫|
వజ్రం అస్త్రం నరశ్రేష్ఠ శైవం శూలవరం తథా |
అస్త్రం బ్రహ్మశిరః చ ఏవ ఐషీకం అపి రాఘవ |౧-౨౭-౬|
దదామి తే మహాబాహో బ్రాహ్మం అస్త్రం అనుత్తమం |
గదే ద్వే చైవ కాకుత్స్థ మోదకీ శిఖరీ శుభే |౧-౨౭-౭|
ప్రదీప్తే నరశార్దూల ప్రయచ్ఛామి నృపాత్మజ |
ధర్మ పాశం అహం రామ కాల పాశం తథైవ చ |౧-౨౭-౮|
వారుణం పాశం అస్త్రం చ దదామి అహం అనుత్తమం |
అశనీ ద్వే ప్రయచ్ఛామి శుష్క ఆర్ద్రే రఘునందన |౧-౨౭-౯|
దదామి చ అస్త్రం పైనాకం అస్త్రం నారాయణం తథా |
ఆగ్నేయం అస్త్రం దయితం శిఖరం నామ నామతః |౧-౨౭-౧౦|
వాయవ్యం ప్రథమం నామ దదామి తవ చ అనఘ |
అస్త్రం హయశిరః నామ క్రౌఞ్చం అస్త్రం తథైవ చ |౧-౨౭-౧౧|
శక్తి ద్వయం చ కాకుత్స్థ దదామి తవ రాఘవ |
కంకాలం ముసలం ఘోరం కాపాలం అథ కింకిణీం |౧-౨౭-౧౨|
వధార్థం రాక్షసాం యాని దదామి ఏతాని సర్వశః |
వైద్యాధరం మహా అస్త్రం చ నందనం నామ నామతః |౧-౨౭-౧౩|
అసి రత్నం మహాబాహో దదామి నృవరాత్మజ |
గాంధర్వం అస్త్రం దయితం మోహనం నామ నామతః |౧-౨౭-౧౪|
ప్రస్వాపనం ప్రశమనం దద్మి సౌమ్యం చ రాఘవ |
వర్షణం శోషణం చైవ సంతాపన విలాపనే |౧-౨౭-౧౫|
మాదనం చైవ దుర్ధర్షం కందర్ప దయితం తథా |
గాంధర్వం అస్త్రం దయితం మానవం నామ నామతః |౧-౨౭-౧౬|
పైశాచం అస్త్రం దయితం మోహనం నామ నామతః |
ప్రతీచ్ఛ నరశార్దూల రాజపుత్ర మహాయశః |౧-౨౭-౧౭|
తామసం నరశార్దూల సౌమనం చ మహాబలం |
సంవర్తం చైవ దుర్ధర్షం మౌసలం చ నృపాత్మజ |౧-౨౭-౧౮|
సత్యం అస్త్రం మహాబాహో తథా మాయామయం పరం |
సౌరం తేజఃప్రభం నామ పర తేజో అపకర్షణం |౧-౨౭-౧౯|
సోమ అస్త్రం శిశిరం నామ త్వాష్ట్రం అస్త్రం సుదారురణం |
దారుణం చ భగస్య అపి శితేషుం అథ మానవం |౧-౨౭-౨౦|
ఏతాన్ రామ మహాబాహో కామ రూపాన్ మహాబలాన్ |
గృహాణ పరమోదారాన్ క్షిప్రం ఏవ నృపాత్మజ |౧-౨౭-౨౧|
స్థితః తు ప్రాఙ్ముఖో భూత్వా శుచిర్ మునివరః తదా |
దదౌ రామాయ సుప్రీతో మంత్ర గ్రామం అనుత్తమం |౧-౨౭-౨౨|
సర్వ సంగ్రహణం ఏషాం దైవతైః అపి దుర్లభం |
తాని అస్త్రాణి తదా విప్రో రాఘవాయ న్యవేదత్ |౧-౨౭-౨౩|
జపతః తు మునేః తస్య విశ్వామిత్రస్య ధీమతః |
ఉపతస్థుః మహా అర్హాణి సర్వాణి అస్త్రాణి రాఘవం |౧-౨౭-౨౪|
ఊచుః చ ముదితా రామం సర్వే ప్రాంజలయః తదా |
ఇమే చ పరమోదార కింకరాః తవ రాఘవ |౧-౨౭-౨౫|
యద్ యద్ ఇచ్ఛసి భద్రన్ తే తత్ సర్వం కరవామ వై |
తతో రామ ప్రసన్న ఆత్మా తైః ఇతి ఉక్తో మహాబలైః |౧-౨౭-౨౬|
ప్రతిగృహ్య చ కాకుత్స్థః సమాలభ్య చ పాణినా |
మనసా మే భవిష్యధ్వం ఇతి తాని అభ్యచోదయత్ |౧-౨౭-౨౭|
తతః ప్రీత మనా రామో విశ్వామిత్రం మహామునిం |
అభివాద్య మహాతేజా గమనాయ ఉపచక్రమే |౧-౨౭-౨౮|
ఇతి వాల్మీకి రామాయణే ఆది కావ్యే బాలకాండే సప్తవింశః సర్గః |౧-౨౭|