పుట:Vasistha Ramayanamu dvipada kavyamu.pdf/277

244

వాసిష్ఠరామాయణము

శిఖిధ్వజోపాఖ్యానము

'అనఘ! శిఖిధ్వజుఁ డను మహారాజు
పనుపడ భూమినిఁ - బాలింపుచుండె,

నతని భార్యామణి-యైన చూడాల
హిత మొప్పఁ బతిభక్తి - నెనయుచునుండె;

నా దంపతులు వృద్ధు-లై యటమీఁద
వేదాంతశాస్త్రముల్ - విన నిశ్చయించి,

వైరాగ్యకలిత భా-స్వర వివేకమున
సారజ్ఞుఁడైనట్టి - సద్గురు చెంతఁ

జేరి శుశ్రూషలు - చేసి మెప్పించి
భూరిసద్భక్తితోఁ బొసఁగ వేఁడినను 980

నాగురుం డిరువుర - కప్పు డధ్యాత్మ
యోగక్రమము లన్నియును కృపమీఱఁ

దెఱఁగొప్పఁగా నుప-దేశంబుఁ జేసి
యరిగె: శిఖిధ్వజుం డా యాత్మబోధ

మఱచి యెప్పటిరీతి - మహి నేలుచుండె
సురుచిరయుక్తిచేఁ - జూడాల గురుని

పదభక్తి మఱువక, - పరమార్థసరణి
మదిని భావించి సమ్మతి నిట్లు దలఁచె-

ధీరుఁడై గురుఁ డుప-దేశించి నట్టి
సారార్ధసరణి విచారించి చూడఁ 990

బంచభూతములచేఁ - బ్రభవించి ధరను
మించి నటించు ని-మ్మేను నేఁ గాను;