గదియ కూరకయున్నఁ జదువులు చదువుచు నిది మేలు కాదని యెత్తుకొనును గన్ను మూసిన పొట్టిరాగాలు సేయు నదరిపడి మిన్న కేనియు నావులించు నిదురవోనీఁడు మేల్కని నిలువనీఁడు వెలికినేఁగిన దానును వెంట నరుగు.
నిలుకాల నిలువనీయక కలుషాత్ముఁడు బాధ పెట్టఁగా విధి నాత్మన్ బలుమాఱు దూఱుఁ గోమటి కొల యెక్కడ గలిగెనంచుఁ గుందుచు నాత్మన్.
మందులు పెట్టితో మఱగి మాపటినుండి గుండె దీసినదనుఁ గొంతతడవు పైత్యంబు గానోపు బగబగమనుచునో కొలుపుచున్నది యను కొంతతడవు తలనొప్పి ఘనమోరి తల యారదో యని కూఁతలు పెట్టును గొంతతడవు కనుదృష్టి దాఁకఁబోలును నాకు నని యావు లింతలు వెట్టును గొంతతడవు