శ్రీరస్తు
ప్రబంధరత్నావళి
అధర్వణాచార్యులు -- [భారతము] (అం.)
శా. తృష్ణాతంతునిబద్ధబుద్ధులగు రాధేయాదులంగూడి శ్రీ
కృష్ణుం గేవలమర్త్యుఁగాఁ దలచి మర్దింపంగ నుత్సాహవ
ర్ధిష్ణుండయ్యె సుయోధనుం డకట! ధాత్రీనాథ! యూహింపుమా
యుష్ణీషంబునఁ గట్టవచ్చునె మదవ్యూఢోగ్రశుండాలమున్? (అం) 1
మ. నతనానావనినాథయూథమకుటన్యస్తాబ్జ రాగోజ్జ్వల
ద్ద్యుతి విభ్రాజితపాదపీఠు లలనాదోశ్చామరోద్ధూత మా
రుతలోలాలి వినీలకుంతలు బ్రభారుగ్ధాము గేయూరశో
భితబాహాపరిఘున్ సువర్ణధరణీభృద్ధైర్యు దుర్యోధనున్. (అం) 2
మ. ప్రణతాశేషవసుంధరాధిప శిరస్స్రగ్గంధలుబ్ధభ్రమ
[1]త్క్వణదభ్ర భ్రమకృద్ద్విరేఫగణఝంకారప్రదాబద్ధసం
[?]ప్రణవత్యుత్ప్రథిత ప్రవర్ధితసమస్తక్షత్త్రసూయాధ్వర
క్షణసింహాసనభాసితున్ దృఢధనుశ్శ్లాఘానుజున్ ధర్మజున్. (అం) 3
సీ. రాజమండలపూర్ణరాజమండలవీధి రత్నగర్భామల రత్నగర్భ
గంధర్వగంధర్వగంధర్వనగరంబు నాగపున్నాగపున్నాగవనము
మార్గణమార్గణమార్గణపీఠ ముత్తుంగభుజంగభుజంగభూమి
కాంతకాంతారాతికాంతకుంతస్థలి వీరకుమారకుమారసరసి
ఆ. యనగ బొగడ్త కెక్కు నలకాపురంబు దే
వేంద్రుపురము దానవేంద్రుపురముఁ
గ్రేణిసేయు లలితశోణాంశుమణిబద్ధ
గోపురంబు హస్తినాపురంబు.
- ↑ ఇందలి 2, 3 చరణముల యర్థము కుదురలేదు. మేము మార్చలేదు.
