ఈ పుట ఆమోదించబడ్డది
96) నీ మౌనం ఏంభయం పెట్టిందో..?
నా మనసు చీకటివెనుకే దాక్కుంటున్నది
97) కన్నీటితో ఎంత తడిపినా ఏంలాభం..?
గుండెలో చెలరేగే దావాగ్ని చల్లారునా..!
98) నానుండి బయటపడి ఎటెళ్ళాలని నీఆరాటం..?
నా మనసుని విశ్వమంతా పరిచానుగా
99) చేతకానివాళ్ళమేగా మనం
మంచీచెడూ తెలిసి ఎవరికీ చెప్పలేక
100) గణితశాస్త్రజ్ఞుడికీ అసాధ్యమే
నీపై నాకున్న ప్రేమను లెక్కించడం
101) మబ్బులు తొలగిన నెలవంక
పైట పక్కకు తప్పుకున్న నీ నడుము వంపులా
102) నీ మనసుకెంత మోమాటం
కలలోకూడ నామనసుని హత్తుకోవాలంటే
103) నీసౌందర్యం మందుపాతరే
చూసిన కళ్ళనన్నింటినీ ఆశ్చర్యాలతో పేల్చేయదూ
104) ఎప్పటికీ మనమింతేనేమో
సుదూరంలో కలిసినట్టున్న భూమ్యాకాశాల భ్రమతో
105) నాప్రేమను తెలపడానికి స్వరభాషెందుకు..?
నిను చూడగానే విప్పారే నాకనుల భాష చాలదూ..!
