పుట:Kankanamu020631mbp.pdf/11

కంకణము

పూర్వ చరిత్రము

చ.⁠

అణువునయందు మేరుగిరియందును నిత్యము నొక్కరీతి న య్యనుపమమౌపరాత్పరు మహత్తర తేజము వెల్గుఁగావునన్ గనుఁగొన నొక్క కంకణమెకా యను నీరసభావ మూన కో యనఘన చరిత్రులార! వినుఁ డయ్య! మదీయకథావిధానమున్.

⁠

చ.⁠

జలముల నేర్పడున్ జనదసంచయముల్, జలముల్ జనించున జ్జలధరజాతమందె; మది సంశయమయ్యె మదీయజన్మమీ జలజలదంబులం దెటనో; సర్వచరాచరకోటి సాటిగా నలినభావాండమందెజననంబని మాత్రము విన్నవించెదన్.

⁠

చ.⁠

ఖరకరు గ్రీష్మభీష్మకరకాండముఖంబున నెన్నిమాఱు లే నరిగితినో నభంబునకు, నభ్రమునుండి మఱెన్నిసారు లే నురనడి జారి భూపతన మొందితినో; బుధులిట్టి జన్మముల్ మరణములుం గణింప రిట మజ్జననక్రమగాథ లేటికిన్ ?

⁠

శా.⁠

నాపాపం బది యేమొకాని భువి నానాయోనిసంజాతుఁడౌ పాపాత్మున్ వలెఁ బెక్కు జీవనములం బ్రాపించుచున్ బుద్బుద వ్యాపారమ్మున సంచరించితి ననేకాబ్దమ్ము లేతన్మహీ వాపీకూపనదీనదాదిబహుళాంభశ్శ్రేణి మధ్యంబులన్.

⁠