| తే. |
ఇత్తెఱంగునఁ దమకడ కేగుదెంచు, గుహుని నల్లంతటనె చూచి గురుమనీష
నంజలి ఘటించి నయవినయజ్ఞుఁ డైన, సూతపుత్రుండు భరతునిఁ జూచి పలికె.
| 1647
|
| క. |
అనఘా యీవచ్చునిషా, దనాయకుఁడు రామసఖుఁడు తడయక మిముఁ గ
న్గొన వచ్చుచున్నవాఁ డీ, యనచేఁ బతి యున్నకందు వది దెలియ నగున్.
| 1648
|
| క. |
నా విని భరతుఁడు సంతో, షావిష్కృతచిత్తుఁ డగుచు నతని రయమునన్
రావింపు మనవుడుఁ దదా, జ్ఞావిధి సూతుండు సమ్ముఖంబు ఘటించెన్.
| 1649
|
| వ. |
ఇవ్విధంబున ననుజ్ఞాతుం డై గుహుండు జ్ఞాతిసమేతంబుగా భరతునొద్దకుం
జనుదెంచి నమస్కరించి దేవా యీదేశంబు మీకు గృహారామభూతంబు
భవద్గమనానివేదనంబున వంచితుల మైతి మే మందఱము భవదధీనులము
గావున స్వకీయం బైన దాసకులంబునందు నివసింపు మని విన్నవించెద మని పలికి
వెండియు ని ట్లనియె.
| 1650
|
| తే. |
ఆర్ద్రశుష్క ముచ్చావచం బగుపలలము, మృష్టఫలముల మధువుఁ బరిగ్రహించి
యిచట నేఁ డెల్ల వసియించి యెల్లి తెల్ల, వాఱినంతనె యరుగుము బలయుతముగ.
| 1651
|
| క. |
అని సౌహార్ధవిశేషం, బునఁ బలికెడుగుహునివచనములు విని వదనం
బున దైన్యము దోఁపఁగ నా, తనితో హేత్వర్థసంహితంబుగఁ బలికెన్.
| 1652
|
| వ. |
పరమసఖా నీ వొక్కండవె యీదృశం బగుసైన్యంబు నభ్యర్చింప నిశ్చ
యించితివి గావున రామునియందు నీకుం గల భక్తిస్నేహంబు లెల్లవారికిఁ
దెల్లం బయ్యె నీయాదరణంబుచేతనే యే మందఱము నీచేత నర్చితు లైన
వార మైతి మిది దురత్యయం బగుగంగానూపం బీదేశంబు దుష్ప్రవేశం బే
మార్గంబున భరద్వాజాశ్రమంబునకుం జనియెద మనిన విని గహనగోచరుం
డగుగుహుండు కృతాంజలిపుటుం డై నరేంద్రా యేను ధనుష్మంతు లైనమదీ
యజ్ఞాతులం గూడి నీపిఱుంద నరుగుదెంచెద నీవు సేనాసమేతుండ వై చను
టకుఁ గారణం బేమి మహాత్ముం డైనరాముని కపకృతి సేయుటకుం బోవు
చున్నవాఁడ వని సందియంబు వొడముచున్నయది యనవుడు గగనంబు
మాడ్కి నిర్మలుం డగుభరతుండు వెండియు గుహునిం జూచి శ్లక్ష్ణవాక్యంబుల
ని ట్లనియె.
| 1653
|
భరతుఁడు గుహునకు నిజాగమనకారణముఁ దెల్పుట
| సీ. |
అనఘ రాఘవుఁడు నా కన్నయుఁ బితృతుల్యుఁ డాచార్యవరుఁడు నియామకుండు
వందనీయుఁడు సదావర్ణనీయుఁడు గురుం డమ్మహాత్మునిచరణాబ్జములకు
భక్తితోఁ బ్రణమిల్లి ప్రార్థనఁ గావించి దండకారణ్యమధ్యముననుండి
మరలఁ దోడ్కొని వచ్చి మహితరాజ్యపదస్థుఁ జేయంగఁ గోరి యీసేనఁ గూడి
|
|
| ఆ. |
పోవుచున్నవాఁడ బొంకు గా దీమాట, నమ్ము మదికి సందియమ్మ వలదు
కలియుగంబు గాదు కల్లలాడుటకు నీ, డెందమందు శంక నొంద వలదు.
| 1654
|
