| |
పన్నుగ మన్నిశాంతమునఁ బర్వతభంగిఁ జెలంగుచున్నయా
పన్నగరాజభూషణుని భవ్యశరాసన మెక్కుపెట్టినన్
సన్నుతగాత్రి నిత్తు నిది సత్యము పల్కినవాఁడ నెంతయున్.
| 1183
|
| వ. |
అనిన నమ్మహీవరు లందఱు ముందుముందుగాఁ దల మిగిలి తమతమభుజాబలం
బులకొలందు లెఱుంగక బహువిధంబులు బోరి యవ్విల్లు నిట్టట్టు గదల్పఁ
జాలక బెండుపడి సిగ్గునం దల యెత్తక నిరాశు లై తమతమదేశంబులకుం జని.
| 1184
|
| తే. |
తరుణి నిచ్చెద ననుచుఁ గోదండ మొకటి, ఘనత నెప మిడి గారించె మనల జనకుఁ
డతని నేచందమున నైన నాజి గెలిచి, యన్నెలంతను గొని వత్త మనుచుఁ గడఁగి.
| 1185
|
| మ. |
సకలక్ష్మావరకోటు లద్భుతభుజాసంరంభ మేపారఁగా
సకలానీకముతోడ వచ్చి విలసచ్ఛౌర్యాతిరేకంబునం
బ్రకటప్రక్రియ మత్పురీవరణము ల్సన్నాహు లై చుట్టి ప
ర్వి కఠోరంబుగ నాక్రమించుటయు నే వీక్షించి యత్యుద్ధతిన్.
| 1186
|
| క. |
చతురంగంబులు గొల్వఁగ, నతులితవిభవంబు మెఱయ నాహవనిపుణో
ద్ధతి వెడలి తీవ్రబాణ, ప్రతతులఁ బరఁగించి భుజబలం బలరారన్.
| 1187
|
| వ. |
నానాప్రకారంబుల నొక్కసంవత్సరంబు రణంబుఁ జేసి మదీయసాధనంబు
లన్నియు సంక్షయించిన భృశదుఃఖితుండ నై సమాహితచిత్తంబున వేల్పుల
నారాధించిన వారు ప్రత్యక్షం బై చతురంగబలంబుల నిచ్చి చనిన దేవదత్త
చమూసమేతుండ నై క్రమ్మఱ రణంబునకుం జని బహువిధశరపరంపరలు నిగు
డించిన.
| 1188
|
| క. |
కొందఱు దెస చెడి పాఱిరి, కొందఱు మద్బాణనిహతిఁ గూలిరి మఱియుం
గొందఱు శరణము నొందిరి, యందముగా నిట్లు విజయ మందితిఁ గడిమిన్.
| 1189
|
| క. |
అనఘాత్మ పరమభాస్వర, మనుషమసారోద్ధతంబు నగునాధనువున్
మునుకొని తెప్పించి యిఁకం, గనిపించెద రాఘవులకుఁ గడుమోదమునన్.
| 1190
|
| క. |
ఆవిల్లు నీరఘూత్తముఁ, డేవిధమున నైన బలిమి నెక్కిడె నేనిన్
నావరపుత్రిక నిచ్చెదఁ, బావకగగనాంబుభూమిపవనులు గుఱిగాన్.
| 1191
|
| క. |
నా విని విశ్వామిత్రుఁడు, భూవల్లభుఁ జూచి పలుకుఁ బొలుపుగ ధనువున్
వావిరి దెప్పించి ముదం, బావహిలం జూపు మీనృపాత్మజున కొగిన్.
| 1192
|
| క. |
అనిన విని జనకుఁ డమ్ముని, యనుమతమున గంధమాలికార్చిత మగుత
ద్ధనువును దెప్పింపుం డని, పనివడి మంత్రులకుఁ జెప్పె ప్రాభవ మలరన్.
| 1193
|
జనకుఁడు విశ్వామిత్రుకడకు శివధనువు దెప్పించుట
| వ. |
ఇ ట్లాజ్ఞాపించిన వారు రయంబునఁ బురంబులోనికిం జని.
| 1194
|
