ఈ పుట ఆమోదించబడ్డది
18.ఆ.నీదుయోగమహిమ నీవిభూతివిశేష
ముల వచింపు మరల జలజనయన !
ఈ మహామృతంబు నెన్నిసారులు విన్నఁ
దృప్తి లేదు నాకు దేవదేవ !
శ్రీ భగవంతుడిట్లనియె :-
19. ఆ. అకట ! నావిభూతులంత్యంబు లేనట్టి
వగుట విస్తరింప వలను గాదు;
వానియందు ముఖ్యమైనవానిని శుభం
బైనవాని విశద పఱతు వినుము.
20. తే. అన్ని భూతాశయంబుల కాత్మ నగుచు
వాని కాధారముగ నుండు వాఁడ నేన;
అవని సృష్టిని స్థితిని నంత్యమును గూడ
భూతజాలంబు నా చేతఁ బొందుచుండు.
21. తే. సూర్యులందఱలోన విష్ణువును నేన;
జ్యోతులం దెల్ల దినకరజ్యోతి నేన;
వాయువులలో మరీచి యన్వాయు వేన?
ఉడుగుణంబులలోనఁ జంద్రుండను నేన.
22. తే. వేదముల శ్రేష్ఠ మౌసామవేద మేన;
వాసవుండను నేనదేవతలయందు;
ఇంద్రియములందు మానసంబేన; మఱియు
భూతముల కెల్ల నేఁ జుమీ చేతనంబు