ఓమ్
శ్రీకృష్ణపరబ్రహ్మణేనమః
శ్రీ మద్భగవద్గీత
దశమాధ్యాయము
విభూతి యోగము
శ్రీ భగవంతుడిట్లనియె :-
01. ఆ. ప్రీతి నింతవఱకు విన సంతసించిన
విషయములను మఱియు విశదపరుప
నీదుహితము గోరి నేనింక నొకమాటు
శ్రేష్ఠవచనముల వచింతు వినుము.
02. ఆ. వరఋషీశ్వరులును సురగణంబులను నా
యద్భుతప్రభావ మరయఁగలరె?
అమరులకును ఋషులకాదిభూతుఁడ; వారి
కేన శక్తు లెల్ల నిచ్చువాఁడ.
03. తే. అఖిలలోకేశ్వరుండ నంచజుఁడ ననుచు
ఆదిరహితుండ నంచు నన్నరయువాని
మౌఢ్యమెల్లను నశియించుమఱియు సర్వ
పాపములనుండి విడివడు; భవ్యచరిత!
04. తే. బుద్ధి జ్ఞాన మసమ్మోహమును క్షమయును
సత్యనిరతత్వమును దమశ్శమగుణములు
సౌఖ్యదుఃఖముల్ భవమును సంకటంబు
భయముఁ జెందుచుంటయును నిర్భయము మఱియు.
05. తే. తుష్టియును నహింసయు సమదృష్టి తపము
నీవి యశమును మఱి యశోహీనతయును
భూతములు పొందు బహుగుణంబులును మహిని
గలుగుచుండును నాదుసంకల్పముననె.