ఈ పుట అచ్చుదిద్దబడ్డది
శ్రీలక్ష్మీనరసింహాయనమః
చంద్రికాపరిణయము
తృతీయాశ్వాసము
క. విలసత్కమలాపదయుగ
లలితానుపమానదివ్యలాక్షాలక్ష్మో
జ్జ్వలతరకౌస్తుభమణిపి
చ్ఛిలరుచివక్షోవిశాల శ్రీగోపాలా! 1
తే. చిత్తగింపుము శౌనకాద్యుత్తమర్షి
సమితి కిట్లను రోమహర్షణతనూజుఁ
డప్పు డామోద మూని యక్షాధిపతి మ
హీంద్రుఁ దిలకించి వెండియు నిట్టు లనియె. 2
చ. ఇరఁ గల పద్మినీతతులయింపును సొంపు నడంచు మంపునం
గరముఁ బొసంగు చంద్రిక యఖండవిలాసము సన్నుతింపఁగాఁ
దరమె తదీయదీధితివితానము గన్గొనుమాత్రఁ బెంపు దు
ష్కరగతి మించు భూర్యసమకాండగవోదితతాపమండలిన్. 3
సీ. నెలఁత చన్గవదారి నెఱికొప్పు కటియొప్పు
ఘనచక్రవైఖరి నని నడంచుఁ,
గొమ్మ కన్నులరాణ నెమ్మోము మెడగోము
కలితాబ్జమహిమంబుఁ దలఁగఁ జేయు,
సకి నుందొడలరీతి చికురాళి నఖపాళి
సుకలభోర్జితజయస్ఫూర్తి నలరుఁ,
జెలి వలగ్నాభ పల్కులతీరు నూఁగారు
హరిమదాపహవృత్తి నతిశయిల్లు,
