పుట:Chandrika-Parinayamu.pdf/144

ఉ. దాన నొకింతయున్ విధృతిఁ దాల్పని యాదమినేతఁ జూచి, త
త్సూనశరుండు బీరమున శూరత యుట్టిపడంగ నయ్యెడన్
మానితపారిజాతసుమనఃకలికాగద కేల నెత్తి, య
మ్మౌనిని మోఁదె దివ్యకుసుమప్రతతుల్ మరుదాళి నింపఁగన్. 90

ఉ. అందుల కింతయుం జలనమందనిపెంపున కబ్బురం బెదం
జెంది, ప్రసూనకోశతటిఁ జెల్వగు గేదఁగిఱేకుఁజిక్కటా
రంది, యనూనరోషగతి నమ్మునిఁ గ్రుమ్మె మరుండు శాంకరా
మందమనోధృతిక్షపణమాన్యభుజాబలరేఖ హెచ్చఁగన్. 91

చ. సరసబలంబు గొల్వ సుమసాయకుఁ డంతటఁ బోక మౌని డా
సి రమణ మొగ్గ యన్ గుదియఁ జేకొని మొత్తి ప్రవాళ మన్మహా
పరశువుఁ బూని వే యడిచి బాగగు మంకెనవంకిఁ బట్టి ప
ల్తరములఁ గ్రుమ్మి యార్చె హిమధాముఁడు గన్గొని మెచ్చ నయ్యెడన్. 92

తే. ఇట్టు లమ్మారుఁ డమ్ముని నెనసి యని ఘ
టించు నవ్వేళ నిది వేళయంచుఁ దలఁచి
చిత్రరేఖావధూటి విచిత్రరీతి
శమి కనతిదూరమున సఖీజనము గొలువ. 93

సీ. తిలకాళిఁ దిలకించుఁ జెలి పెండ్లితఱిఁ గాంచు
తెఱఁగు తపస్వికిఁ దెలుపుకరణి,
గోఁగుచెంగటఁ బల్కుఁ గోమలి ప్రియములు
పలుకుటల్ దపసికిఁ దెలుపుకరణి,
మావిపైఁ గరముంచు మగువ కళాస్థాన
మలముటల్ మౌనికిఁ దెలుపుకరణిఁ,
గ్రోవిఁ గౌఁగిటఁ దార్చుఁ గుముదాక్షిపరిరంభ
కలనంబు యోగికిఁ దెలుపుకరణి,