కాపువారిలో వంటలకు కుండలే యెక్కువగా వాడు ఆచారము. ఆనాడు గోల్కొండ వ్యాపారులలో కరణీకము చేయువారి వేషాలను కవి యిట్లు వర్ణించెను.
మెలిబెట్టి చుట్టిన తెలిపైఠిణీపాగ చెవిసందిపాగలో జెక్కుకలము
తొడరిన నెరిచల్వనడరు నంగీజోడు జీరాడు నడికట్టు చెరగుకొనలు
పదతలంబుల నెర్రపారు పాపోసులు చెక్కుగా జంక చీటీఖిలీతి
నడికట్టులో మొల విడిన ఖలందాను హస్తాగ్రమున వ్రేలు దస్తరంబు
మించు బాహువుమీద కాశ్మీరశాలు
చెవుల ముత్యాలపోగులు చెలువుదనర
అలతి నీర్కావి దోవతి యమర నటకు
పారుపత్యంబు సేయు వ్యాపారి వచ్చె (2-30)
కాపువారిలోని కొన్ని శాఖలను కవి యిట్లు తెలిపినాడు.
పంట, మోటాటి, పెడగంటి, పాకనాటి,
అరవెలమలాది కొండారె, మొరుసుగోన,
కొణిదెకాపులు, మొదలైన క్షోణిదనరు
కాపులకునెల్ల మిన్న యక్కాపుకొకుకు, (4-136)
సెట్టి బలిజిల వేష మెట్టిదనగా :
సరిపెణతోడిసజ్జ బలుసందిటి తాయెతు లింగవస్త్రముల్
నరిగె చెరంగుపాగ విలసన్మణి ముద్రిక లంచుకమ్ములున్
మెరుగులు గుల్కు దోవతియు, మిన్నగు నీలపు పోగుజోడు బి
త్తరపు విభూతి రేఖలరుతన్ రుదురాచ్చలు గల్గి భాసిలున్. (5-99)
సెట్టి బలిజెలు ఎద్దులపై ఎక్కి పోవుచుండెడివారు. (5-100)
తెల్లవారగానే గొల్లవారు మజ్జిగ చిల్కుచుండిరనియు, 'కాపు కూతులు తెలియావ నాళములు ద్రొక్కగ జేయుచుండి' రనియు కవి తెలిపినాడు. (1-195)
గొల్లసుద్దులు చెప్పు గొల్లజాతివారు కొంద రుండిరి. వారు కృష్ణలీలలను, కాటమరాజుకథను ప్రధానముగ చెప్పుచుండెడివారు. (2-88)
