ఓయమ్మా నల్లగొండ
ఓయమ్మా నల్లాగొండ ఒడుపులేని ఎర్రాగొండ
నదులెన్నో పారుతున్నా నవుసుతున్న మొండిబండా ॥ఓయమ్మా॥
భూస్వాములనెదిరించినావు దేశముఖ్‌ల తరిమీనావు
రజాకార్ల రక్తంతాగి రణభూమిగా మారినావు
నీలినీలి కొండల్లోనా నల్లగుండె నేనన్నావు
త్యాగాలెన్నో జేసీనావు తనువునే అర్పించినావు
ప్రపంచాన నెత్తుటి గురుతు పౌరుషాన రగిలే కొండ ॥ఓయమ్మా॥
వాగువంకలెండీపాయె చెరువు కుంట కబ్జాలాయె
బావులన్ని బండలు దేలే బతుకులేమో నెర్రెలు బారె
భూగర్భాన నీరేలేదు ఫ్లోరోసిసు పిండము బెరిగే
ఫ్లోరైడు భూతంగన్నా అంశలా స్వామిని జూడు
తాటికల్లు పచ్చీపులుసు తాగకుంటే పానం బోవు ॥ఓయమ్మా॥
మూసీనది బోసీబాయె మురికినీటి కూపామాయె
కృష్ణమ్మా బిరబిర ఉరికే ఎడమసేత ఎత్తిపోసే
గోదారి గలగలబారే మాగోడు వినకా పాయె
బోరుబాయి కారెంటుకోత ఒక్కమడి దడువకపాయె
వానసినుకు అదునూమీద పడకుంటే ఉరితాడాయే ॥ఓయమ్మా॥
ప్రాజెక్టులెన్నో ఈడ ముంపులల్ల ఊరుజాడ
తాగునీరు లేనేలేదు సాగునీరు ఊసేలేదు
ఉద్యమాలు అణిచిపెట్టి ఉన్నయన్ని ఊడ్చుకపాయె
విప్లవాలు పోరాటాలు లెక్కలేని పరిపాలనాయె
బీడునేల పెరిగీపాయె నీల్లుగానీ తాగూడాయే ॥ ఓయమ్మా॥
అంబటి వెంకన్న పాటలు
176
