యశము గోరిన దొరకొడుకైనవాఁడు ఇన్ని చెప్పులు కడఁ ద్రోసి యియ్యవలయు మదరిపువిఫాల మునిజనహృదయలోల వేణుగోపాల భక్తసంత్రాణశీల!
ఆత్మ తెలియని యోగి కద్వైతములు మెండు నెఱఱంకులాఁడికి నిష్ఠ మెండు పాలు పిండని గొడ్డుబఱ్ఱె కదుపు మెండు కల్లపసిండికిఁ గాంతి మెండు గెలువని రాజుకు బలుగచ్చులును మెండు వంధ్యకు విభునిపై వాంఛ మెండు దబ్బరవాటకుఁ దలద్రిప్పుటలు మెండు పసిమిరోగపు లొత్తు మిసిమి మెండు వండలేనక్కకు వగపులు బలుమెండు లేలేని యన్నకు తిండి మెండు కూటికియ్యని విటకాని పోటు మెండు మాచకమ్మకు మోహంబు మదిని మెండు మదరిపువిఫాల మునిజనహృదయలోల వేణుగోపాల భక్తసంత్రాణశీల!
ఆలిని వంచుకోఁజాలక తగవర్ల బ్రతిమాలుకొనువాని బ్రతుకు రోఁత నర్తనాంగనల వెన్కను జేరి తాళముల్ వాయించువాని జీవనము రోఁత వ్యభిచరించెడి వారవనిత గర్భంబునఁ బురుషత్వము వహించి పుట్ట రోఁత బంధుకోటికి సరిపడని దుర్వృత్తిని బడియున్న మనుజుని నడత రోఁత యరసికుండైన నరపతి నాశ్రయించి కృతులొనర్చెడి కవి నెత్తిగీఁత రోఁత మదరిపువిఫాల మునిజనహృదయలోల వేణుగోపాల భక్తసంత్రాణశీల!