పుట:2015.370800.Shatakasanputamu.pdf/254

సీ. ఖలహిరణ్యాక్షముఖ్యులనెల్ల ఖండించి
               దేవతాతతి బ్రోచు దివ్యమహిమ
     రావణకుంభకర్ణప్రముఖులనెల్ల
               గొట్టి మౌనులఁ బ్రోచి దిట్టతనము
     శిశుపాలకాది దుశ్శీలురఁ బరిమార్చి
               క్షితి దీనజనుల రక్షించు కడక
     కంసాది దుష్టవిధ్వంసనం బొనరించి
               ధరణి బాలించు నుదారకరుణ
గీ. వినుటయే కాని కన్నులఁ గనుట లేదు
     కంటి మిప్పుడు యవనుల గర్వమణఁచి
     ప్రజల రక్షించు నీదు ప్రభావమెల్ల
     వైరిహరరంహ! సింహాద్రి నారసింహ!68
సీ. కారుణ్యదృష్టిచేఁ గని మిమ్ము రక్షింప
               నీరజేక్షణ నేఁడు నీవు బంపఁ
     బారసీకుల దండుపైఁ గొండలోనుండి
               గండుతుమ్మెదలు నుద్దండలీల
     గల్పాంతమున మిన్ను గప్పి భీకరమైన
               కాఱుమేఘంబులు గవిసినట్లు
     దాఁకి భోరున రక్తధారలు గురియగా
               గఱచి నెత్తురు పీల్చి కండలెల్ల
గీ. నూడిపడ నుక్కుమూతుల వాఁడి మెఱసి
     చించి చెండాడి వధియించెఁ జిత్రముగను
     నొక్కొక్కని చుట్టుముట్టి బల్ మిక్కుటముగ
     వైరిహరరంహ! సింహాద్రి నారసింహ!69