పుట:2015.370800.Shatakasanputamu.pdf/253

వికీసోర్స్ నుండి
ఈ పుట అచ్చుదిద్దబడ్డది

సీ. నీపాదరజమున నిమిషంబులోపల
               బాపురే సతియయ్యెఁ జాపరాయి
     నీబాహుబలమున నిలవక పెళ్ళున
               ముక్కంటి చాపంబు ముక్కలయ్యె
     నీయాజ్ఞచే గిరుల్ నీట దెప్పునఁ దేలెఁ
               కడఁక సముద్రంబు గట్టువడియె
     నీప్రతాపాగ్నిచే నిఖిలరాక్షసకోటి
               మాడి దోమలపోల్కి మడసిపోయె
గీ. బాగులే! యిట్టినెరవైన ప్రాపు గల్గి
     యల్పులకు లొంగి తిరుగలేమయ్య! మేము
     కర్మమా! మాకు గజమెక్కి గంతదూర
     వైరిహరరంహ! సింహాద్రి నారసింహ!66
సీ. మున్ను తాటకప్రాణము ల్గొన్న బాణంబు
               మెఱసి సుబాహు దున్మినవిశిఖము
     మించి విరాధు ఖండించిన ప్రదరంబు
               ఖరదూషణాదు సంహారశరము
     మాయలమారీచు మదమణంచినతూపు
               ఘోరకబంధుని గూల్చుచిలుకు
     వాలి మహాశాలి గూలనేసిన కోల
               జలధి నింకించిన సాయకంబు
గీ. రావణాదిమహాసురరాజి నణఁచు
     చండకాండంబు లేమాయె చటులయవన
     ఖండనము సేయ నయ్యంబకములఁ బఱపు
     వైరిహరరంహ! సింహాద్రి నారసింహ!67