ఓం
శ్రీ మేధా దక్షిణామూర్తయే నమః
శ్రీ త్రికోటేశ్వరాయ నమః
శ్రీమత్త్రికూటాచల మాహాత్మ్యము
ప్రథమాశ్వాసము
_____*****_____
శ్రీ మద్దివ్యవిభావటద్రుమ వితర్దిస్థాన సంస్థాయియై
వామాంకంబున బ్రహ్మవిద్య గిరిజావామాక్షి సేవింపఁగాఁ
బ్రేమన్ మౌనుల కాత్మదాయి యగు నా శ్రీదక్షిణామూర్తి స
ద్భూమ బ్రహ్మము నే భజింతుఁ బరమామోదంబు సంధిల్లఁగన్.1
శ్రీశైలేంద్ర సరోజ భృంగము మహాసిద్ధావళీ మానస
క్లేశాస్తోకతమః పతంగము జగత్క్షేమంకరాపాంగమున్
పాశచ్చేది కథాప్రసంగము సుధా పాటీర డిండీర పా
ళీ శుభ్రాంగము మల్లికార్జున మహాలింగంబు సేవించెదన్. 2
కాసర రక్త బీజ మధుకైటభ శుంభ నిశుంభ చండ ముం
డాసుర యోధయూథముల నాజి మదంబడఁగించి, విక్రమా
భ్యాసుని ఘోరదైత్యు నరుణాసురుఁ గూల్పగ శ్రీనగాన వీ.
రాసనవాసియైన భ్రమరాంబ మదిష్టము లీవుగావుతన్. 3
తతపింఛచ్ఛవి శక్రచాపముగఁ జెంతన్ లక్ష్మి సౌదామినీ
లతికాకారతఁబూన వేణురవ గర్జారావ మొప్పన్ మహో
న్నతి భక్తావళి చాతకంబులకు నానందామృతాసార ము
ద్ధతి వర్షించెడి కృష్ణమేఘ మఘసంతాపంబు చల్లార్చెడిన్.4