పుట:వరాహపురాణము (నంది మల్లయ, ఘంట సింగయ).pdf/66

శ్రీ

వరాహపురాణము

చతుర్థాశ్వాసము

క.⁠

శ్రీమహిమహిళావిహరణ, ధామదృగంభోజబాహుదర్వీకర ర క్షోమథనకథారసధా, రామధురిమలోల యీశ్వరప్రభునరసా.

⁠ 1

వ.⁠

అవధరింపు మవ్వరాహదేవుండు ధరణి కి ట్లనియె నట్లు శయ్యాగృహంబు సొచ్చి దుర్జయకుమారవతంసంబు హంసతూలికాతల్పంబున మేను గదియించి కిన్నరవరా రామంబునఁ దనచూచినవరారోహలహావభావంబులు భావభిత్తిం జిత్రించిన విధంబున నుండ నొండొండ కోర్కులు నిండ ననుంగునెచ్చెలిం గనుంగొని.

⁠ 2

సీ.⁠

మదనధనుర్మేఘమార్గణధారాళవర్షంబు వారింప వసము గాదు చింతానిలజ్వలత్సంతాపజిహ్వాలదహనంబు చల్లార్పఁ దరము గాదు వ్రీడాగుణాసమన్వితధైర్యజంఘాలదంతావళము నిల్పఁ దరము గాదు హృదయాలవాలబాలేచ్ఛాజటాలవల్లుల వెనుకకు దివ్వ నలవి గాదు విరహలహరీఘటాసముద్వేలరా, జలనిధానంబు ధరియింపఁ గొలఁది గాదు ధీతరణ్యస్తమయజమోహాతిభీష, ణాంధకారంబు విరియింప హవణు గాదు.

⁠ 3

చ.⁠

వెడవెడఁ బయ్యెదల్ సడలి వ్రేఁకపుగుబ్బచనుంగవల్ బయ ల్పడ వెడవింటివేల్పునకు లక్తకరక్తిమ తొంగలింపఁగా నడుగులు గొంత యెత్తి కుసుమాంజలి యిచ్చినరీతి నాకు నె న్నడు దలఁబ్రాలు పోయుదురొ నర్మసఖా తదరాళకుంతలల్.

⁠ 4

క.⁠

నరునకుఁ బ్రదక్షిణంబులు, దిరిగెడుసమయమునఁ బ్రహరి దిరిగెడుయామ ద్విరదములఁ బోలునామం, ధరయానల మఱవ వచ్చునా చెలికాఁడా.

⁠ 5

ఉ.⁠

క్రొన్ననవింటివేలుపునకున్ మహిఁ జాగిలి మ్రొక్కి లేచి కిం చిన్నత లైనవేళ విలసిల్లిరి నీరజపత్రనేత్ర లా కొన్ననవింటి వేల్పు రతిఁ గూడి తటస్థుని నన్ను నేయఁ గై కొన్నశరాసనంబు లనఁ గూర్తిసఖా నయనాభిరామలై.

⁠ 6