పుట:రంగనాథరామాయణము - ఉత్తరకాండ.pdf/11

బెంపారు లంకకుఁ బ్రియముతో వచ్చి, యింపారు నప్పురం బెలమి నేలుదును
నిచ్చలు గంధర్వనిర్జరస్తుతుల, నచ్చరిలేమల యాటపాటలను
మది కొప్ప నుదయార్కుమాడ్కిఁ దేజమునఁ, బొదలుచు లీలమై పుష్పకం బెక్కి
తక్కనిభక్తితోఁ దల్లిదండ్రులకు, మ్రొక్కి పోవుచు నిట్లు ముదముతో నుండె
ననవుఁడు నతినిర్మలాగ్నియుఁబోలె, జనపతి తలయూఁచి సంయమిఁ జూచి
యెలమి రాక్షసులకు నీలంక మున్ను, కలుగుట విదితంబుగా వింటి నేఁడు
పొరిఁ బులస్త్యునికులంబున నిశాచరులు, పరఁగుట విందు నప్పౌలస్త్యునందు
ఘనుఁడు రావణకుంభకర్ణులకంటె, ననుపమబలుఁడు ప్రహస్తునికంటెఁ
గడిమి నవ్వికటునికంటె రావణుని, కొడుకులకంటె నెక్కుడు బాహుబలము
గలవాడు తొంటిరాక్షసు లెవ్వ రీడు, బలవంతుఁ డరివీరభయుఁ డెవ్వఁ డరయ
నతితరజయశీలుఁ డగుచున్న విష్ణు, చేత నేగతిఁ బరాజితు లైరి వారు
విన వేడ్కఁ బుట్టెడు వివరించి చెప్పుఁ, డన నమ్మహాత్ముండు ననియె రామునకు
నరనాథ కొందఱ నలువ యుగాదిఁ, బొరి జలంబులలోనఁ బుట్టించె నంత
వారు నాఁకలినీరువట్టును బట్టి, వారిజాసను గానవచ్చి కే ల్మొగిచి
యే మెట్లు మనువార మిటమీఁద మాకు, నేమివర్తన మన్న నించుక నవ్వి
యుదకంబు రక్షించు నొగి నంచుఁ బలికె, మది వారిపలుకులు మహితాత్ముఁ డెఱిఁగి
రక్షింతుమనువారు రమణ రాక్షసులు, శిక్షింతుమనువారు క్షితి యక్షు లనియె
రాక్షసకులమున రఘువర కడిమి, నీక్షింప హేతిప్రహేతు లన్వారు
మధుకైటభులఁ బోలి మహి నిశాచరుల, కధిపతులై పుట్టి రందుఁ బ్రహేతి
పరిణయం బొల్లఁడు పరఁగంగ హేతి, వరియించె నుభయవైవస్వతానుజుఁడు
అంత విద్యుత్కేశుఁ డనువాఁడు పుట్టె, నంతకు చెలియలి కాహేతివలన
నతఁడును సోదకంబగు మేఘలీల, నతిశయిల్లుచు నూత్నయౌవనుఁ డైన
సాలకటంకటాసంజ్ఞాభిధానఁ, బోల సంధ్యాదేవి పుత్త్రి పుత్త్రునకు
హేతి పెండిలి సేసె నెలమితో నదియు, జాతగర్భస్థితి జని మందిరమున
సుతుఁ గాంచి యట నొక్కచోఁ బాఱవైచి, రతికిఁ గ్రమ్మఱ వచ్చె రమణునికడకు
బాలుఁడు నాననపంకజంబునకుఁ, గేలుమాటుగఁ జేసి గిరిగుహల్ చెలఁగ
నెలుఁగెత్తి పిలిచె బీరెండ నోరెండఁ, బలుమాఱు నుఱిమిన వంగి వాపోవ
నందివాహనముపై నగరాజసుతయు, నిందుమౌళియు మింట నేగుచునుండి
విని గౌరి వెరగంది వింటివే దేవ, కనుఁగొంటివే వీనిఁ గనుఁగొనవలయు