176
ముకుందవిలాసము
గీ॥ మహి విరాజరాజమధ్యంబునను హేమ
దీప్తవాసు వాసుదేవుఁ గాఁగ
నెఱిగె నంత నంతరితగాఁగ విస్పూర్తి
హితశుకైక కైకయేంద్రతనయ.202
కం॥ మునుఁగోర్కిగన్న చూడ్కులు
కనుఁజూడ్కులకన్న హృద్వికాసము హృదయం
బునకన్న మున్న భావము
జని శౌరిం గలయఁదివురు సతి కవ్వేళన్.203
కం॥ కీరము సెప్పిన మాటలు
శ్రీరమణుం జూచు తనదు చిత్తముతేటల్
మాఱాకులెత్త నత్తఱి
మారాకుల యగుచు మగువ మదిలో ననియెన్.204
సీ॥ ఇతని యాకృతికెల్ల నెనగాక చంద్రుండు
నెమ్మోము తీరుగా నిలువఁబోలు
నితని లోచనముల కెనగాక పద్మముల్
పదములరేఖలై యొదుగఁబోలు
నితని దానప్రౌఢి కెనగాక కల్పశా
ఖలు కరంబులరీతి మెలఁగఁబోలు
నితని ధైర్యంబున కెనగాక హేమాద్రి
దరితానురఃస్ఫూర్తిఁ దనరఁబోలు
నౌర ! శృంగారరసములో సౌరు దీసి
నేర్పున నొనర్పఁబోలు నీనేత ధాత
లేక యేతాదృశవిలాసలీల గనునె
దానవారాతి మానినీసూనహేతి.205
